phir wahi kunj-e-qafas

chand lamhoñ ke liye shor uThā Duub gayā

kohna zanjīr-e-ġhulāmī kī girah kaT na sakī

phir vahī sail-e-balā hai vahī dām-e-amvāj

nā-ḳhudāoñ meñ safīne kī jagah baT na sakī

TūTte dekh ke derīna ta.attul kā fusūñ

nabz-e-ummīd-e-vatan ubhrī magar Duub ga.ī

peshvāoñ kī nigāhoñ meñ tazabzub pā kar

TūTtī raat ke saa.e meñ sahar Duub ga.ī

mere mahbūb vatan tere muqaddar ke ḳhudā

dast-e-āġhyār meñ qismat kī inaañ chhoḌ ga.e

apnī yak-tarfa siyāsat ke taqāzoñ ke tufail

ek baar aur tujhe nauha-kunāñ chhoḌ ga.e

phir vahī gosha-e-zindāñ hai vahī tārīkī

phir vahī kohna salāsil vahī ḳhūnīñ jhankār

phir vahī bhuuk se insāñ kī satīza-kārī

phir vahī maaoñ ke nauhe vahī bachchoñ kī pukār

tere rahbar tujhe marne ke liye chhoḌ chale

arz-e-bañgāl! unheñ Dūbtī sāñsoñ se pukār

bol! chaTgāñv kī mazlūm ḳhamoshī kuchh bol

bol ai piip se riste hue sīnoñ kī bahār

bhuuk aur qaht ke tūfān baḌhe aate haiñ

bol ai ismat-o-iffat ke janāzoñ kī qatār

rok un TūTte qadmoñ ko unheñ pūchh zarā

pūchh ai bhuuk se dam toḌte Dhāñchoñ kī qatār

zindagī jabr ke sāñchoñ meñ Dhalegī kab tak

in fazāoñ meñ abhī maut palegī kab tak

chand lamhon ke liye shor uTha Dub gaya

kohna zanjir-e-ghulami ki girah kaT na saki

phir wahi sail-e-bala hai wahi dam-e-amwaj

na-KHudaon mein safine ki jagah baT na saki

TuTte dekh ke derina tattul ka fusun

nabz-e-ummid-e-watan ubhri magar Dub gai

peshwaon ki nigahon mein tazabzub pa kar

TuTti raat ke sae mein sahar Dub gai

mere mahbub watan tere muqaddar ke KHuda

dast-e-aghyar mein qismat ki inan chhoD gae

apni yak-tarfa siyasat ke taqazon ke tufail

ek bar aur tujhe nauha-kunan chhoD gae

phir wahi gosha-e-zindan hai wahi tariki

phir wahi kohna salasil wahi KHunin jhankar

phir wahi bhuk se insan ki satiza-kari

phir wahi maon ke nauhe wahi bachchon ki pukar

tere rahbar tujhe marne ke liye chhoD chale

arz-e-bangal! unhen Dubti sanson se pukar

bol! chaTganw ki mazlum KHamoshi kuchh bol

bol ai pip se riste hue sinon ki bahaar

bhuk aur qaht ke tufan baDhe aate hain

bol ai ismat-o-iffat ke janazon ki qatar

rok un TuTte qadmon ko unhen puchh zara

puchh ai bhuk se dam toDte Dhanchon ki qatar

zindagi jabr ke sanchon mein Dhalegi kab tak

in fazaon mein abhi maut palegi kab tak