phir wahi raat

phir vahī raat hai vīrānī-e-dil hai meñ huuñ

tum na mil kar jo bichhaḌtīñ to bahut āsāñ thā

ziist ke ajnabī rastoñ se guzarnā merā

tum ne badlā jo na hotā mirā meyār-e-nazar

koī mushkil na thā duniyā meñ bahalnā merā

apnī tanhā.ī kā dard aaj kahāñ se lā.ūñ

kis se fariyād karūñ kis se mudāvā chāhūñ

bhuul tak bhī na sakūñ jis ko bhulānā chāhūñ

ai mirī vahshat-e-dil tū hī batā kyā chāhūñ

rang-e-rukHsār gul-o-lāla meñ kab tak DhūñDūñ

lab samajh kar tire sho.aloñ ko kahāñ tak chūmūñ

marmarīñ jism ke ehsās meñ khoyā khoyā

chāñdnī rātoñ meñ be-vaj.h kahāñ tak ghūmūñ

tere anfās kī ḳhushbū se mo.attar hai jo dil

nik.hat-e-lāla-o-gul se vo kahāñ bahlegā

jis ne kal tak tire khulte hue lab dekhe the

aaj kaliyoñ ke chaTakne ko kahāñ samjhegā

ek kauñdā sā to lapkā thā mirī āñkhoñ meñ

phir añdhere ke sivā kuchh nazar aayā na mujhe

ik sitāra sā to TuuTā thā mirī rātoñ meñ

mo.ajiza phir koī āñkhoñ ne dikhāyā na mujhe

phir vahī raat hai vīrānī-e-dil hai maiñ huuñ

phir wahi raat hai virani-e-dil hai mein hun

tum na mil kar jo bichhaDtin to bahut aasan tha

zist ke ajnabi raston se guzarna mera

tum ne badla jo na hota mera meyar-e-nazar

koi mushkil na tha duniya mein bahalna mera

apni tanhai ka dard aaj kahan se laun

kis se fariyaad karun kis se mudawa chahun

bhul tak bhi na sakun jis ko bhulana chahun

ai meri wahshat-e-dil tu hi bata kya chahun

rang-e-rukHsar gul-o-lala mein kab tak DhunDun

lab samajh kar tere shoalon ko kahan tak chumun

marmarin jism ke ehsas mein khoya khoya

chandni raaton mein be-wajh kahan tak ghumun

tere anfas ki KHushbu se moattar hai jo dil

nikhat-e-lala-o-gul se wo kahan bahlega

jis ne kal tak tere khulte hue lab dekhe the

aaj kaliyon ke chaTakne ko kahan samjhega

ek kaunda sa to lapka tha meri aankhon mein

phir andhere ke siwa kuchh nazar aaya na mujhe

ek sitara sa to TuTa tha meri raaton mein

moajiza phir koi aankhon ne dikhaya na mujhe

phir wahi raat hai virani-e-dil hai main hun