phulon ki bahaar

chalte chalte thak gayā huuñ kulfatoñ se chuur huuñ

chain se mahrūm huuñ ārām se maiñ duur huuñ

baaġh meñ aane de maalī hai qasam gul kī tujhe

de rahī hai Daalī Daalī diid kī dāvat mujhe

phuul khilte haiñ basantī nasha-āvar hai fazā

god meñ apne jhulātī hai unheñ bād-e-sabā

baaġh kī āñkheñ haiñ ye yā haiñ sitāre zau-fishāñ

chhūTte haiñ rañg-o-bū ke goyā favvāre yahāñ

rañgateñ dekhūñgā un kī aur lūTūñgā bahār

log jaate haiñ idhar se par nahīñ karte nazar

phuul kyā kyā haiñ khile hotī nahīñ un ko ḳhabar

kaam meñ bhūle hue haiñ saare duniyā ke maze

dil hī dil meñ ghuT ke rah jaate haiñ un ke hausle

par maiñ khelūñgā guloñ se aur lūTūñgā bahār

un ke husn-e-rūh-parvar se sukūñ paatā hai dil

jaane kyā chupke hī chupke mujh se kah jaatā hai dil

kis se pyāre kī dilāte haiñ ye mujh ko yaad ab

aur mujhe apnā samajh kar maiñ bulāte sab ke sab

ġham bhulā dūñgā maiñ un meñ aur lūTūñgā bahār

shāḳh par ġhunche khileñge aur kumhlā jā.eñge

hañs hañsā kar ik ghaḌī ke baad murjhā jā.eñge

zindagī meñ maut kā kyoñ ġham kareñ kyoñ dukh yahīñ

is riyāz-e-dahr meñ jab tak raheñ hañste raheñ

un se sīkhūñgā maiñ hañsnā aur lūTūñgā bahār

chalte chalte thak gaya hun kulfaton se chur hun

chain se mahrum hun aaram se main dur hun

bagh mein aane de mali hai qasam gul ki tujhe

de rahi hai Dali Dali did ki dawat mujhe

phul khilte hain basanti nasha-awar hai faza

god mein apne jhulati hai unhen baad-e-saba

bagh ki aankhen hain ye ya hain sitare zau-fishan

chhuTte hain rang-o-bu ke goya fawware yahan

rangaten dekhunga un ki aur luTunga bahaar

log jate hain idhar se par nahin karte nazar

phul kya kya hain khile hoti nahin un ko KHabar

kaam mein bhule hue hain sare duniya ke maze

dil hi dil mein ghuT ke rah jate hain un ke hausle

par main khelunga gulon se aur luTunga bahaar

un ke husn-e-ruh-parwar se sukun pata hai dil

jaane kya chupke hi chupke mujh se kah jata hai dil

kis se pyare ki dilate hain ye mujh ko yaad ab

aur mujhe apna samajh kar main bulate sab ke sab

gham bhula dunga main un mein aur luTunga bahaar

shaKH par ghunche khilenge aur kumhla jaenge

hans hansa kar ek ghaDi ke baad murjha jaenge

zindagi mein maut ka kyon gham karen kyon dukh yahin

is riyaz-e-dahr mein jab tak rahen hanste rahen

un se sikhunga main hansna aur luTunga bahaar