phulon ki shahzadi

kalī se kah rahī thī ek din shabnam gulistāñ meñ

rahī maiñ ek muddat ġhuncha-hā-e-bāġh-e-rizvāñ meñ

tumhāre gulistāñ kī kaifiyat sarshār hai aisī

nigah firdaus dar-e-dāman hai merī chashm-e-hairāñ meñ

sunā hai koī shahzādī hai hākim us gulistāñ kī

ki jis ke naqsh-e-pā se phuul hoñ paidā bayābāñ meñ

kabhī saath apne us ke āstāñ tak mujh ko tū le chal

chhupā kar apne dāman meñ ba-rañg-e-mauj-e-bū le chal

kalī bolī sarīr-ārā hamārī hai vo shahzādī

daraḳhshāñ jis kī Thokar se hoñ patthar bhī nagīñ ban kar

magar fitrat tirī uftinda aur begam kī shaan ūñchī

nahīñ mumkin ki tū pahuñche hamārī ham-nashīñ ban kar

pahuñch saktī hai tū lekin hamārī shāhzādī tak

kisī dukh dard ke maare kā ashk-e-ātishīñ ban kar

nazar us kī payām-e-'īd hai ahl-e-moharram ko

banā detī hai gauhar ġham-zadoñ ke ashk-e-paiham ko

kali se kah rahi thi ek din shabnam gulistan mein

rahi main ek muddat ghuncha-ha-e-bagh-e-rizwan mein

tumhaare gulistan ki kaifiyat sarshaar hai aisi

nigah firdaus dar-e-daman hai meri chashm-e-hairan mein

suna hai koi shahzadi hai hakim us gulistan ki

ki jis ke naqsh-e-pa se phul hon paida bayaban mein

kabhi sath apne us ke aastan tak mujh ko tu le chal

chhupa kar apne daman mein ba-rang-e-mauj-e-bu le chal

kali boli sarir-ara hamari hai wo shahzadi

daraKHshan jis ki Thokar se hon patthar bhi nagin ban kar

magar fitrat teri uftinda aur begam ki shan unchi

nahin mumkin ki tu pahunche hamari ham-nashin ban kar

pahunch sakti hai tu lekin hamari shahzadi tak

kisi dukh dard ke mare ka ashk-e-atishin ban kar

nazar us ki payam-e-'id hai ahl-e-moharram ko

bana deti hai gauhar gham-zadon ke ashk-e-paiham ko