pile diye

ho tasavvur ishq kā aur ho syāhī raat kī

umr nāzuk mom sī ho shab ho is baat kī

shahar kī ThanDī havā chehre pe maiñ letā huā

ḳhush-nasībī kā vo imkāñ jaise ho pahlā juā

thak ga.e jo shor se to ghar ko jaa.e mai piye

Taar kī lambī saḌak ho us pe hoñ piile diye

umr jaise kaT rahī ho aur ghaTtī bhī na ho

ishq kī kaalī ghaTā ho aur chhaTtī bhī na ho

us ke ḳhat kī raah dekhūñ vaqt maiñ zaa.e.a karūñ

aur us ke ḳhvāb meñ bhī kaash maiñ aayā karūñ

ḳhushbū yak dam phuul kī ho ho dhueñ ke silsile

Taar kī lambī saḌak ho us pe hoñ piile diye

ho suhānī taḳhliya ho ġham jo Talne vaalā ho

yaar merā saath mere aah bharne vaalā ho

jaise saḌkeñ bhī yahāñ bistar ke jaisī narm hoñ

ho to sardī sard lekin lams us kā garm ho

merī adnā zindagī ho us ke adnā marhale

Taar kī lambī saḌak ho us pe hoñ piile diye

ye bhī toḌe jā rahe ho āshiyāñ banñe to do

maiñ to būḌhā bhī nahīñ nostalgia banñe to do

kalpvriksh aur aab āb-e-kausar sochte ho daur kī

sharm hai gar chaah ho us shahar meñ bhī huur kī

jannatoñ kā hai tasavvur bas yahī mere liye

Taar kī lambī saḌak ho us pe hoñ piile diye

mujh ko jharnoñ kī havas na.ī aur kañval na hī jhiil kī

mujh ko chiḌh bhī hai nahīñ is factory us miil kī

ik bachā hai laal sūraj us ko to tum rahne do

us ke mukhḌe kā jo TukḌā chāñd vo to rahne do

varna phir to is shahar meñ kyā mare aur kyā jiye

Taar kī lambī saḌak ho us pe hoñ piile diye

ho tasawwur ishq ka aur ho syahi raat ki

umr nazuk mom si ho shab ho is baat ki

shahar ki ThanDi hawa chehre pe main leta hua

KHush-nasibi ka wo imkan jaise ho pahla jua

thak gae jo shor se to ghar ko jae mai piye

Tar ki lambi saDak ho us pe hon pile diye

umr jaise kaT rahi ho aur ghaTti bhi na ho

ishq ki kali ghaTa ho aur chhaTti bhi na ho

us ke KHat ki rah dekhun waqt main zaea karun

aur us ke KHwab mein bhi kash main aaya karun

KHushbu yak dam phul ki ho ho dhuen ke silsile

Tar ki lambi saDak ho us pe hon pile diye

ho suhani taKHliya ho gham jo Talne wala ho

yar mera sath mere aah bharne wala ho

jaise saDken bhi yahan bistar ke jaisi narm hon

ho to sardi sard lekin lams us ka garm ho

meri adna zindagi ho us ke adna marhale

Tar ki lambi saDak ho us pe hon pile diye

ye bhi toDe ja rahe ho aashiyan banne to do

main to buDha bhi nahin nostalgia banne to do

kalpwriksh aur aab aab-e-kausar sochte ho daur ki

sharm hai gar chah ho us shahar mein bhi hur ki

jannaton ka hai tasawwur bas yahi mere liye

Tar ki lambi saDak ho us pe hon pile diye

mujh ko jharnon ki hawas nai aur kanwal na hi jhil ki

mujh ko chiDh bhi hai nahin is factory us mil ki

ek bacha hai lal suraj us ko to tum rahne do

us ke mukhDe ka jo TukDa chand wo to rahne do

warna phir to is shahar mein kya mare aur kya jiye

Tar ki lambi saDak ho us pe hon pile diye