پیری

سب بال پک گئے ہیں کمر ہو گئی ہے خم

آنکھوں سے سوجھتا تو ہے لیکن بہت ہی کم

ہاتھوں میں کپکپی ہے کبھی پھولتا ہے دم

برہم ہیں دانت کہتے ہیں ٹھہریں گے اب نہ ہم

پیری نے آ کے لوٹ لی دولت شباب کی

حالت بگڑ گئی دل خانہ خراب کی

پیری ہے آدمی کے لئے اک وبال جاں

آمد ہے اس کی موت کی آمد کا اک نشاں

جب تن کی مملکت پہ یہ ہوتی ہے حکمراں

طاقت جواب دیتی ہے منہ دھوتا ہے دھواں

ہوش و ہواس و عقل و خرد جوش و ولولے

سب کہتے ہیں پکار کے لو اب تو ہم چلے

جھک جاتا ہے وہ تیر سا قد ہو کے پھر کماں

یعنی کہ زندگی کا ہے بار اس پہ اب گراں

چلنے میں بولتے ہیں جو پیروں کے استخواں

کہتے ہیں اپنی ضعف و نقاہت کی داستاں

ہے لطف و عیش زیست کہ جب تک شباب ہے

پھر اس کے بعد زیست سمجھ لو عذاب ہے