piri

sab baal pak ga.e haiñ kamar ho ga.ī hai ḳham

āñkhoñ se sūjhtā to hai lekin bahut hī kam

hāthoñ meñ kapkapī hai kabhī phūltā hai dam

barham haiñ daañt kahte haiñ Thahreñge ab na ham

piirī ne aa ke luuT lī daulat shabāb kī

hālat bigaḌ ga.ī dil-e-ḳhāna-ḳharāb kī

piirī hai aadmī ke liye ik vabāl-e-jāñ

aamad hai us kī maut kī aamad kā ik nishāñ

jab tan kī mamlikat pe ye hotī hai hukmrāñ

tāqat javāb detī hai muñh dhotā hai dhuāñ

hosh-o-havās-o-aql-o-ḳhirad josh-o-valvale

sab kahte haiñ pukār ke lo ab to ham chale

jhuk jaatā hai vo tiir sā qad ho ke phir kamāñ

ya.anī ki zindagī kā hai baar us pe ab girāñ

chalne meñ bolte haiñ jo pairoñ ke ustuḳhvāñ

kahte haiñ apnī zo.af-o-naqāhat kī dāstāñ

hai lutf-o-aish ziist ki jab tak shabāb hai

phir is ke baad ziist samajh lo azaab hai

sab baal pak gae hain kamar ho gai hai KHam

aankhon se sujhta to hai lekin bahut hi kam

hathon mein kapkapi hai kabhi phulta hai dam

barham hain dant kahte hain Thahrenge ab na hum

piri ne aa ke luT li daulat shabab ki

haalat bigaD gai dil-e-KHana-KHarab ki

piri hai aadmi ke liye ek wabaal-e-jaan

aamad hai us ki maut ki aamad ka ek nishan

jab tan ki mamlikat pe ye hoti hai hukmran

taqat jawab deti hai munh dhota hai dhuan

hosh-o-hawas-o-aql-o-KHirad josh-o-walwale

sab kahte hain pukar ke lo ab to hum chale

jhuk jata hai wo tir sa qad ho ke phir kaman

yani ki zindagi ka hai bar us pe ab giran

chalne mein bolte hain jo pairon ke ustuKHwan

kahte hain apni zoaf-o-naqahat ki dastan

hai lutf-o-aish zist ki jab tak shabab hai

phir is ke baad zist samajh lo azab hai