krishn-kanhaiya

jo sun letā hai gosh-e-dil se afsāna kanhaiyā kā

vo ho jaatā hai sachche dil se dīvāna kanhaiyā kā

nazar aatī hai jis ko ḳhvāb meñ vo sūrat-e-dilkash

vo apnā dil banā letā hai kāshāna kanhaiyā kā

surūr-o-kaif kī miltī hai us ko lazzat-e-dā.im

lagā letā hai hoñToñ se jo paimāna kanhaiyā kā

tum apnā haath phailāo zarā saaqī kī mahfil meñ

ki bāñTā jā rahā hai aaj paimāna kanhaiyā kā

kisī par band hone kā nahīñ mai-ḳhana-e-ulfat

chale aao khulā rahtā hai mai-ḳhāna kanhaiyā kā

kanhaiyā kī mohabbat meñ jo jaañ par khel jaatā hai

use sab log kah dete haiñ dīvāna kanhaiyā kā

'nahīf' apne parā.e sab isī ke dil meñ rahte haiñ

sab apne haiñ nahīñ koī bhī begāna kanhaiyā kā

jo sun leta hai gosh-e-dil se afsana kanhaiya ka

wo ho jata hai sachche dil se diwana kanhaiya ka

nazar aati hai jis ko KHwab mein wo surat-e-dilkash

wo apna dil bana leta hai kashana kanhaiya ka

surur-o-kaif ki milti hai us ko lazzat-e-daim

laga leta hai honTon se jo paimana kanhaiya ka

tum apna hath phailao zara saqi ki mahfil mein

ki banTa ja raha hai aaj paimana kanhaiya ka

kisi par band hone ka nahin mai-KHana-e-ulfat

chale aao khula rahta hai mai-KHana kanhaiya ka

kanhaiya ki mohabbat mein jo jaan par khel jata hai

use sab log kah dete hain diwana kanhaiya ka

'nahif' apne parae sab isi ke dil mein rahte hain

sab apne hain nahin koi bhi begana kanhaiya ka