ummid ke karishme

jab koī naav Dagmagātī hai

aas jab dil kī TuuT jaatī hai

sab ḳhudā.ī nazar phirātī hai

sirf ummīd kaam aatī hai

ye agar dil se kuuch kar jaa.e

aadmī tilmilā ke mar jaa.e

zindagī kī bahār hai ummīd

aatmā kī pukār hai ummīd

hamdam-o-ġham-gusār hai ummīd

jān-o-dil kā ubhār hai ummīd

man meñ aashā guzar jo kartī hai

Dūbtī nabz bhī ubhartī hai

zindagī kā hai aasrā ummīd

ek jīvan hai ḳhushnumā ummīd

kāmyābī kā rāsta ummīd

mar gayā vo huā jo nā-ummīd

aas rakhnā hī dūr-bīnī hai

raat ke baa'd din yaqīnī hai

aas jab dil ko gudgudātī hai

ruuh ko niiñd se jagātī hai

jhoñpaḌoñ ko mahal banātī hai

jangaloñ meñ bahār laatī hai

aadmī ko ye zindagānī hai

zindagānī kī ye javānī hai

sirf ummīd ke bharose par

chal rahā hai hayāt kā chakkar

baiTh rahte haiñ log jab thak kar

ye baḌhātī hai himmateñ aksar

quvvatoñ par shabāb aatā hai

zo.af tharrā ke bhaag jaatā hai

le ke ummīd kā diyā maalī

baaġh kī kar rahā hai rakhvālī

garche phūloñ se hai chaman ḳhālī

aas ne jī meñ jaan hai Daalī

garm jhoñke jo dil jalāte haiñ

phuul aashā ke man lubhāte haiñ

dhuup meñ ek ġham-zada mazdūr

belcha haath meñ thakan se chuur

apnī mehnat se hai bahut masrūr

hai suhānī umang se bharpūr

muskurātā hai baar baar aise

lahlahātī haiñ khetiyāñ jaise

thak ke hotā hai past jab nā-chār

baiTh jaatā hai haañp kar ik baar

aas kahtī hai yuuñ na himmat haar

haañ kamar kas ke jald hoshiyār

uTh ke vo poñchh kar pasīne ko

taan letā hai apne siine ko

ek dukhiyā ġharīb dukhiyārī

jaatī hai apne laal par vaarī

chakkiyāñ piis kar ba-dushvārī

pāltī hai use vo bechārī

us kī aashā hai naunihāl us kā

motiyoñ se sivā hai laal us kā

ek būḌhā marīz hai lāchār

phir bhī vo jaan se nahīñ bezār

aas himmat bañdhātī hai har baar

khol detā hai aañkh vo bīmār

zindagī jab javāb detī hai

aas fauran sañbhāl letī hai

al-ġharaz sab kī hai na.ī ummīd

aadmī kī hai zindagī ummīd

zinda-dil vo hai jis ne kī ummīd

jī kī sāthī hai vāqa.ī ummīd

ye agar zindagī meñ kho jaa.e

marnā jiinā azaab ho jaa.e

is se to ek dil nahīñ ḳhālī

sab ke jī meñ basī hai matvālī

hai ye fitrat kī god kī paalī

kāmyābī ke peḌ kī Daalī

dil ke ākāsh kā sitārā hai

sab ke jīvan kā ye sahārā hai

is ko hai ān-bān kī ummīd

is ko shāhī nishān kī ummīd

kuchh anokhī javān kī ummīd

sab se pyārī kisān kī ummīd

aas meñ dukh pe dukh uThātā hai

giit gā gā ke hal chalātā hai

ḳhushk hoñ jabki naddiyāñ naale

hoñ hare khet sūkhne vaale

dhuup meñ hote hoñ hiran kaale

balki paḌ jaa.eñ jaan ke laale

TūTtī hai jahān kī ummīd

par bañdhī hai kisān kī ummīd

us kī aashā bahār kī ummīd

bādaloñ ke nikhār kī ummīd

mausam-e-ḳhush-gavār kī ummīd

halkī halkī phuhār kī ummīd

us kī aashā pe khetiyāñ qaa.em

us kī ummīd par jahāñ qaa.em

ġham kare kis liye udaas hameñ

kāmyābī kī jab hai aas hameñ

mehnatoñ se nahīñ hirās hameñ

apnī ummīd kā hai paas hameñ

kitnī sundar hai kyā suhānī hai

dil kī malika hai man kī raanī hai

jab koi naw Dagmagati hai

aas jab dil ki TuT jati hai

sab KHudai nazar phiraati hai

sirf ummid kaam aati hai

ye agar dil se kuch kar jae

aadmi tilmila ke mar jae

zindagi ki bahaar hai ummid

aatma ki pukar hai ummid

hamdam-o-gham-gusar hai ummid

jaan-o-dil ka ubhaar hai ummid

man mein aasha guzar jo karti hai

Dubti nabz bhi ubharti hai

zindagi ka hai aasra ummid

ek jiwan hai KHushnuma ummid

kaamyabi ka rasta ummid

mar gaya wo hua jo na-ummid

aas rakhna hi dur-bini hai

raat ke ba'd din yaqini hai

aas jab dil ko gudgudati hai

ruh ko nind se jagati hai

jhonpaDon ko mahal banati hai

jangalon mein bahaar lati hai

aadmi ko ye zindagani hai

zindagani ki ye jawani hai

sirf ummid ke bharose par

chal raha hai hayat ka chakkar

baiTh rahte hain log jab thak kar

ye baDhati hai himmaten aksar

quwwaton par shabab aata hai

zoaf tharra ke bhag jata hai

le ke ummid ka diya mali

bagh ki kar raha hai rakhwali

garche phulon se hai chaman KHali

aas ne ji mein jaan hai Dali

garm jhonke jo dil jalate hain

phul aasha ke man lubhate hain

dhup mein ek gham-zada mazdur

belcha hath mein thakan se chur

apni mehnat se hai bahut masrur

hai suhani umang se bharpur

muskuraata hai bar bar aise

lahlahati hain khetiyan jaise

thak ke hota hai past jab na-chaar

baiTh jata hai hanp kar ek bar

aas kahti hai yun na himmat haar

han kamar kas ke jald hoshiyar

uTh ke wo ponchh kar pasine ko

tan leta hai apne sine ko

ek dukhiya gharib dukhiyari

jati hai apne lal par wari

chakkiyan pis kar ba-dushwari

palti hai use wo bechaari

us ki aasha hai naunihaal us ka

motiyon se siwa hai lal us ka

ek buDha mariz hai lachaar

phir bhi wo jaan se nahin bezar

aas himmat bandhati hai har bar

khol deta hai aankh wo bimar

zindagi jab jawab deti hai

aas fauran sanbhaal leti hai

al-gharaz sab ki hai nai ummid

aadmi ki hai zindagi ummid

zinda-dil wo hai jis ne ki ummid

ji ki sathi hai waqai ummid

ye agar zindagi mein kho jae

marna jina azab ho jae

is se to ek dil nahin KHali

sab ke ji mein basi hai matwali

hai ye fitrat ki god ki pali

kaamyabi ke peD ki Dali

dil ke aakash ka sitara hai

sab ke jiwan ka ye sahaara hai

is ko hai aan-ban ki ummid

is ko shahi nishan ki ummid

kuchh anokhi jawan ki ummid

sab se pyari kisan ki ummid

aas mein dukh pe dukh uThata hai

git ga ga ke hal chalata hai

KHushk hon jabki naddiyan nale

hon hare khet sukhne wale

dhup mein hote hon hiran kale

balki paD jaen jaan ke lale

TuTti hai jahan ki ummid

par bandhi hai kisan ki ummid

us ki aasha bahaar ki ummid

baadalon ke nikhaar ki ummid

mausam-e-KHush-gawar ki ummid

halki halki phuhaar ki ummid

us ki aasha pe khetiyan qaem

us ki ummid par jahan qaem

gham kare kis liye udas hamein

kaamyabi ki jab hai aas hamein

mehnaton se nahin hiras hamein

apni ummid ka hai pas hamein

kitni sundar hai kya suhani hai

dil ki malika hai man ki rani hai