pop ki muafi

mujassam taqaddus safedī meñ Duubā

baḌī shaan se chhoTī khiḌkī meñ aaya

zamīñ par paḌe ik saroñ ke samundar

ko nazroñ kā parshād de kar

bahut ājizī se

mahal ke kushāda kisī kamre meñ kho gayā

yaqīnan ibādat kī ḳhātir

nayā saal aaya

masīhā.ī taaza laboñ par sajā kar

chamakdār sone kī lāThī sañbhāle

zarī ke libās-e-kushāda meñ malbūs dhīre se goyā huā

faqat ājizī hai ilaaj

baḌho dard ke māroñ ko baḌh ke thāmo

na chhūTe ye dāman kabhī ājizī kā

aqīdat kā haala gale meñ paḌī surḳh shaal

aur is par zar-o-sīm-o-naqsh-o-nigār

bahut bojh hai vo sañbhāle hue

chhat aur hall aur surḳh pardoñ pe hai vajd taarī

magar is se aarī samundar ke paar

be-hangam uge ḳhud-rau jangal kī aulād

columbus kī nasloñ ke pairoñ tale kachchī miTTī ke Dher

qabīloñ ke kīḌe-makoḌe zamīnoñ ke bojh

sañbhāle hue apne kānoñ ke āñkhoñ ke kashkol

juḌe dekhnā chāhte haiñ jo larzīda akḌe hue haath

ghisaTte chale aa.e haiñ reñgte reñgte

taqaddus ko apnī muāfī kī ḳhairāt dene ke ḳhush-fahm

adab nā-shanās

mujassam taqaddus safedi mein Duba

baDi shan se chhoTi khiDki mein aaya

zamin par paDe ek saron ke samundar

ko nazron ka parshad de kar

bahut aajizi se

mahal ke kushada kisi kamre mein kho gaya

yaqinan ibaadat ki KHatir

naya sal aaya

masihai taza labon par saja kar

chamakdar sone ki laThi sanbhaale

zari ke libas-e-kushada mein malbus dhire se goya hua

faqat aajizi hai ilaj

baDho dard ke maron ko baDh ke thamo

na chhuTe ye daman kabhi aajizi ka

aqidat ka haala gale mein paDi surKH shaal

aur is par zar-o-sim-o-naqsh-o-nigar

bahut bojh hai wo sanbhaale hue

chhat aur hall aur surKH pardon pe hai wajd tari

magar is se aari samundar ke par

be-hangam uge KHud-rau jangal ki aulad

columbus ki naslon ke pairon tale kachchi miTTi ke Dher

qabilon ke kiDe-makoDe zaminon ke bojh

sanbhaale hue apne kanon ke aankhon ke kashkol

juDe dekhna chahte hain jo larzida akDe hue hath

ghisaTte chale aae hain rengte rengte

taqaddus ko apni muafi ki KHairaat dene ke KHush-fahm

adab na-shanas