poTli

lekin vo nahīñ gayā

use ma.alūm huā ki us kī maañ

bistar-e-marg par paḌī hai

aur shāyad chand dinoñ kī mehmān hai

lekin vo nahīñ gayā

ye vaqt aisā hotā hai

jab marne vaalā

pīchhe rah jaane vāloñ se

aur zinda rah jaane vaale

aage jaane vāloñ se

apnī apnī ġhalatiyoñ kī muāfī māñgte haiñ

aur bachche apnī maaoñ se

duudh baḳhshavāne dauḌe chale aate haiñ

lekin vo phir bhī nahīñ gayā

vo ajiib maḳhmase meñ paḌ gayā

agar us ne duudh nahīñ piyā

to Thiik hai

lekin agar piyā hai

to duudh josh kyoñ nahīñ mārtā

use sab yaad aa rahā thā

baap hī ne use pālā-posā

us kā bachpan aur baap kī javānī

saath saath guzre

us kī nau-ḳhez umrī

aur baap kī adheḌ umrī ek saath aa.e

baap baḌe shauq se

us kī shādī ke baare meñ soch rahā thā

ki qatl ho kar rāhi-e-mulk-e-adam ho gayā

aur vo mab.hūt akelā

khaḌe kā khaḌā rah gayā

us kī shādī kārobār naukrī

hattā ki us ke bachchoñ se

us aurat kā

jise ab vo maañ samajhne lagā thā

bas itnā hī ta'alluq rahā

jitnā ki kisī bhī dūsre shaḳhs

kā ho saktā hai

yahāñ tak ki aaj us kī

ye maañ bhī mar ga.ī

janāze par jaanā bekār lagā

aaj kyoñ kis ke liye

kisī ne kaan meñ kahā

marne vāloñ se kyā iḳhtilāf

vo to un ke saath hī ḳhatm ho jaate haiñ

haañ zindoñ se mumkin hai

mayyat ke sirhāne baiThā

to ruuh ke saare charāġh

ek ek kar ke raushan ho ga.e

vo tamām umr us aurat ke pyaar hī nahīñ

us kī duāoñ ko bhī tarastā thā

aur ab tarastā hī rahegā

yak-dam us ke badan ne jhurjhurī lī

aur nafrat kī ruuh

jaise hamesha ke liye parvāz kar ga.ī

log qabr ko miTTī de rahe the

us ne bhī chhe dahā.īyoñ se

miTTī meñ pakḌī

apnī chāhat kī aglī poTlī

āhistagī se luḌhkā dī

lekin wo nahin gaya

use malum hua ki us ki man

bistar-e-marg par paDi hai

aur shayad chand dinon ki mehman hai

lekin wo nahin gaya

ye waqt aisa hota hai

jab marne wala

pichhe rah jaane walon se

aur zinda rah jaane wale

aage jaane walon se

apni apni ghalatiyon ki muafi mangte hain

aur bachche apni maon se

dudh baKHshawane dauDe chale aate hain

lekin wo phir bhi nahin gaya

wo ajib maKHmase mein paD gaya

agar us ne dudh nahin piya

to Thik hai

lekin agar piya hai

to dudh josh kyon nahin marta

use sab yaad aa raha tha

bap hi ne use pala-posa

us ka bachpan aur bap ki jawani

sath sath guzre

us ki nau-KHez umri

aur bap ki adheD umri ek sath aae

bap baDe shauq se

us ki shadi ke bare mein soch raha tha

ki qatl ho kar rahi-e-mulk-e-adam ho gaya

aur wo mabhut akela

khaDe ka khaDa rah gaya

us ki shadi karobar naukri

hatta ki us ke bachchon se

us aurat ka

jise ab wo man samajhne laga tha

bas itna hi ta'alluq raha

jitna ki kisi bhi dusre shaKHs

ka ho sakta hai

yahan tak ki aaj us ki

ye man bhi mar gai

janaze par jaana bekar laga

aaj kyon kis ke liye

kisi ne kan mein kaha

marne walon se kya iKHtilaf

wo to un ke sath hi KHatm ho jate hain

han zindon se mumkin hai

mayyat ke sirhane baiTha

to ruh ke sare charagh

ek ek kar ke raushan ho gae

wo tamam umr us aurat ke pyar hi nahin

us ki duaon ko bhi tarasta tha

aur ab tarasta hi rahega

yak-dam us ke badan ne jhurjhuri li

aur nafrat ki ruh

jaise hamesha ke liye parwaz kar gai

log qabr ko miTTi de rahe the

us ne bhi chhe dahaiyon se

miTTi mein pakDi

apni chahat ki agli poTli

aahistagi se luDhka di