premchand ko KHiraj-e-aqidat

vo premchand-munshī-e-be-misl-o-be-badal

thī jis ke dam se bazm-e-adab meñ chahal-pahal

afsāne jis ke sham-e-hidāyat the bar-mahal

nā-vaqt aah ho gayā vo luqma-e-ajal

is soz-e-jāñ-gusil se har ik dil kabāb hai

fart-e-tapish hai ātish-e-ġham be-hisāb hai

ilmī shaġhaf se us ke nahīñ kaun bā-ḳhabar

har qalb par fasāne hue naqsh kal.hajar

hai bahr-e-ilm terī ravānī se sar-basar

dāmān-o-jeb-e-urdu-o-hindī haiñ pur-guhar

tarz-e-bayāñ har ek kā tū ne dikhā diyā

dhabba har ik kā apne qalam se miTā diyā

bazm-e-adab ko ḳhvāb meñ bhī ye na thā ḳhayāl

unnīs sau chhattīs kā nahs hogā us ko saal

avval vafāt-e-barq kā us ko huā malāl

phir chal diyā jahān se ye munshī-bā-kamāl

naqsh-e-qarār sail-e-fanā se miTā hai aaj

aivān-e-nazm-o-nasr meñ mātam bapā hai aaj

tujh ko premchand ye shāyad nahīñ ḳhabar

kitnā vafāt kā tirī duniyā pe hai asar

'sūfī' jahāñ meñ DhūñDhtī hai us ko har nazar

ai māhtāb-e-ishq batā tū chhupā kidhar

kyā shauq sāma.īñ kā farāmosh ho gayā

afsāna kahte kahte jo ḳhud haa.e so gayā

wo premchand-munshi-e-be-misl-o-be-badal

thi jis ke dam se bazm-e-adab mein chahal-pahal

afsane jis ke sham-e-hidayat the bar-mahal

na-waqt aah ho gaya wo luqma-e-ajal

is soz-e-jaan-gusil se har ek dil kabab hai

fart-e-tapish hai aatish-e-gham be-hisab hai

ilmi shaghaf se us ke nahin kaun ba-KHabar

har qalb par fasane hue naqsh kalhajar

hai bahr-e-ilm teri rawani se sar-basar

daman-o-jeb-e-urdu-o-hindi hain pur-guhar

tarz-e-bayan har ek ka tu ne dikha diya

dhabba har ek ka apne qalam se miTa diya

bazm-e-adab ko KHwab mein bhi ye na tha KHayal

unnis sau chhattis ka nahs hoga us ko sal

awwal wafat-e-barq ka us ko hua malal

phir chal diya jahan se ye munshi-ba-kamal

naqsh-e-qarar sail-e-fana se miTa hai aaj

aiwan-e-nazm-o-nasr mein matam bapa hai aaj

tujh ko premchand ye shayad nahin KHabar

kitna wafat ka teri duniya pe hai asar

'sufi' jahan mein DhunDhti hai us ko har nazar

ai mahtab-e-ishq bata tu chhupa kidhar

kya shauq samain ka faramosh ho gaya

afsana kahte kahte jo KHud hae so gaya