پرائیویٹ وارڈ

ابھی ابھی کوئی بوسیدہ شہر گزرے گا

ٹرین

کالے اندھیرے کی شاخ سے لپٹی

پرانی بجھتی ہوئی لالٹین دیکھے گی

تمام چہرہ حویلی ہے

ہاتھ اور پاؤں

ڈھکے ہوئے ہیں لبادوں سے

کوئی ہنستا ہے

ازل کی بوند سے

انتم سراغ کی کھائی

ذرا سی روشنی دیتی ہے

بالکنی سے

ادھیڑ عمر کی عورت بھی گرنے والی ہے

مکاں کے سامنے حصے میں

کار رکتی ہے

اب آئے ڈاکٹر

کیسے ہو

بال ڈاڑھی کے

سفید تنکوں میں تبدیل ہو گئے ہیں کیا

بدن کتاب کا پنا ہے

روشنی پھینکو

تمہاری پیٹھ سے

جو سیڑھیاں نکلتی ہیں

تم ان پہ چڑھ کے ابھی اپنی کھوئی بھیڑوں کو

صدائیں دوگے

پکڑ لے گا بارشوں کا غم

یہ کیسا شور ہے چھت پر

عجب حویلی ہے

عجیب شور ہے مجھ میں

ٹرین رکتی ہے

ابد کا پانی

اترتا ہے لالٹین میں کیا