prometheus

agar maiñ kahtā huuñ jiinā hai qaid-e-tanhā.ī

to zindagānī kī qīmat pe harf kyuuñ aa.e

agar na aayā mujhe sāzgār vasl-e-habīb

to e'timād-e-mohabbat pe harf kyuuñ aa.e

agar mile mujhe virse meñ kuchh shikasta khañDar

to kā.enāt kī vus.at pe harf kyuuñ aa.e

agar dikhā.ī diye mujh ko aadmī aaseb

to asr-e-nau kī basīrat pe harf kyuuñ aa.e

agar na rāh-e-yaqīñ pā sakī mirī tashkīk

to fikr-o-fan kī sharāfat pe harf kyuuñ aa.e

agar ḳhizāñ hī milī mujh ko aañkh khulne par

to fasl-e-gul kī amānat pe harf kyuuñ aa.e

agar mire ġham-e-be-nām ko milī vahshat

to bazm-e-jashn-e-masarrat pe harf kyuuñ aa.e

maiñ apne ahd kā huuñ nauha-ḳhvāñ na diije daad

qasīda-ḳhvāñ kī rivāyat pe harf kyuuñ aa.e

agar hunar hai mirā jins-e-kam-ayār to ho

zamīr-o-dil kī tijārat pe harf kyuuñ aa.e

maiñ apne ḳhvāboñ kā bhaTkā huā musāfir huuñ

agar mujhe na milī manzil-e-najāt to kyā

maiñ apnī ruuh kī tanhā.iyoñ kā sho.ala huuñ

havā-e-dahr meñ hāsil nahīñ sabāt to kyā

maiñ apnī turfagī-e-tab.a kā to pī luuñ zahr

jo dastaras meñ nahīñ chashma-e-hayāt to kyā

maiñ apnī zaat kī ḳhalvat kā hairatī hī sahī

jo mujh pe khul na sakā rāz-e-kā.enāt to kyā

maiñ apne ḳhuuñ ke charāġhoñ ko raushnī de duuñ

sahar-nasīb na ho paa.e merī raat to kyā

maiñ aap se na kahūñgā ki hai ziyāñ jaañ kā

ḳhayāl-e-shīsha-e-dil sañg-āzmā na kare

maiñ aap se nahīñ chāhūñgā dād-e-jāñ-bāzī

duā hai aap ko ġham dard-āshnā na kare

maiñ aap se nahīñ māñgūñgā ḳhūñ-bahā-e-vafā

koī to tark rah-o-rasm-e-āshiqāna kare

maiñ aap ko na dikhā.ūñgā apne zaḳhmī ḳhvāb

ḳhalal ho aap ke ārām meñ ḳhudā na kare

magar zamīn prometheus ko kyuuñ roke

jo vo jahāñ ke ḳhudāoñ se jañg kartā hai

use na maut ke aaseb paas aane deñ

jo āsmānoñ se le kar hayāt utartā hai

hai Dar pighalne kā dekheñ idhar na barf ke but

jo koī sho.ala-e-uryāñ ye haath dhartā hai

azaab us pe kareñ kam na qahr ke devtā

jo apnī aag meñ jal kar bhī raqs kartā hai

ise na maane kabhī be-hisī hayāt-parast

har ek saañs pe jo zinda ho ke martā hai

kareñ na aap mudāvā-e-soz-e-ātish-e-ġham

ye zulm mujh pe to har roz-o-shab guzartā hai

salāmat aap kā īmān maiñ to huuñ kāfir

har ek vaz.a se apnī hayāt kartā hai

agar main kahta hun jina hai qaid-e-tanhai

to zindagani ki qimat pe harf kyun aae

agar na aaya mujhe sazgar wasl-e-habib

to e'timad-e-mohabbat pe harf kyun aae

agar mile mujhe wirse mein kuchh shikasta khanDar

to kaenat ki wusat pe harf kyun aae

agar dikhai diye mujh ko aadmi aaseb

to asr-e-nau ki basirat pe harf kyun aae

agar na rah-e-yaqin pa saki meri tashkik

to fikr-o-fan ki sharafat pe harf kyun aae

agar KHizan hi mili mujh ko aankh khulne par

to fasl-e-gul ki amanat pe harf kyun aae

agar mere gham-e-be-nam ko mili wahshat

to bazm-e-jashn-e-masarrat pe harf kyun aae

main apne ahd ka hun nauha-KHwan na dije dad

qasida-KHwan ki riwayat pe harf kyun aae

agar hunar hai mera jins-e-kam-ayar to ho

zamir-o-dil ki tijarat pe harf kyun aae

main apne KHwabon ka bhaTka hua musafir hun

agar mujhe na mili manzil-e-najat to kya

main apni ruh ki tanhaiyon ka shoala hun

hawa-e-dahr mein hasil nahin sabaat to kya

main apni turfagi-e-taba ka to pi lun zahr

jo dastaras mein nahin chashma-e-hayat to kya

main apni zat ki KHalwat ka hairati hi sahi

jo mujh pe khul na saka raaz-e-kaenat to kya

main apne KHun ke charaghon ko raushni de dun

sahar-nasib na ho pae meri raat to kya

main aap se na kahunga ki hai ziyan jaan ka

KHayal-e-shisha-e-dil sang-azma na kare

main aap se nahin chahunga dad-e-jaan-bazi

dua hai aap ko gham dard-ashna na kare

main aap se nahin mangunga KHun-baha-e-wafa

koi to tark rah-o-rasm-e-ashiqana kare

main aap ko na dikhaunga apne zaKHmi KHwab

KHalal ho aap ke aaram mein KHuda na kare

magar zamin prometheus ko kyun roke

jo wo jahan ke KHudaon se jang karta hai

use na maut ke aaseb pas aane den

jo aasmanon se le kar hayat utarta hai

hai Dar pighalne ka dekhen idhar na barf ke but

jo koi shoala-e-uryan ye hath dharta hai

azab us pe karen kam na qahr ke dewta

jo apni aag mein jal kar bhi raqs karta hai

ise na mane kabhi be-hisi hayat-parast

har ek sans pe jo zinda ho ke marta hai

karen na aap mudawa-e-soz-e-atish-e-gham

ye zulm mujh pe to har roz-o-shab guzarta hai

salamat aap ka iman main to hun kafir

har ek waza se apni hayat karta hai