pukar waqt ki

chalo ki pahle nafratoñ kī

ān-bān toḌ deñ ye vaqt kī pukār hai

alag alag ye rāstoñ pe reñgte se qāfile

qadam qadam musāfiroñ ke TūTte se hausle

ye reñgte se qāfiloñ ko

TūTte se hausloñ ko

ik Dagar se joḌ deñ ye vaqt kī pukār hai

ye shahr shahr ḳhuun ke bahāv meñ basā huā

ye gaañv gaañv aapsī tanāv meñ kasā huā

ye ḳhuun ke bahāo kī

ye aapsī tanāv kī

kalā.iyāñ maroḌ deñ ye vaqt kī pukār hai

galī galī TaToltī ghaTā.eñ luuT maar kī

nagar nagar meñ Doltī havā.eñ intishār kī

ye lūT-mār kī ghaTā

ye intishār kī havā

samundaroñ meñ chhoḌ deñ ye vaqt kī pukār hai

ye aadmī se aadmī kī dūriyāñ ye khā.iyāñ

ye apne haath se tabāh ho ke phir duhā.iyāñ

ye dūriyāñ ye khā.iyāñ

ye chīḳh ye duhā.iyāñ

har ik qadam jhiñjhoḌ deñ ye vaqt kī pukār hai

ye sūkhe sūkhe phuul par bahār kī javāniyāñ

ye jhulse jhulse rang ruup baaġh kī nishāniyāñ

javāniyoñ ke jaam meñ

nishāniyoñ kī shaam meñ

rutoñ kā ḳhuuñ nichoḌ deñ ye vaqt kī pukār hai

chalo ki pahle nafraton ki

aan-ban toD den ye waqt ki pukar hai

alag alag ye raston pe rengte se qafile

qadam qadam musafiron ke TuTte se hausle

ye rengte se qafilon ko

TuTte se hauslon ko

ek Dagar se joD den ye waqt ki pukar hai

ye shahr shahr KHun ke bahaw mein basa hua

ye ganw ganw aapsi tanaw mein kasa hua

ye KHun ke bahao ki

ye aapsi tanaw ki

kalaiyan maroD den ye waqt ki pukar hai

gali gali TaTolti ghaTaen luT mar ki

nagar nagar mein Dolti hawaen intishaar ki

ye luT-mar ki ghaTa

ye intishaar ki hawa

samundaron mein chhoD den ye waqt ki pukar hai

ye aadmi se aadmi ki duriyan ye khaiyan

ye apne hath se tabah ho ke phir duhaiyan

ye duriyan ye khaiyan

ye chiKH ye duhaiyan

har ek qadam jhinjhoD den ye waqt ki pukar hai

ye sukhe sukhe phul par bahaar ki jawaniyan

ye jhulse jhulse rang rup bagh ki nishaniyan

jawaniyon ke jam mein

nishaniyon ki sham mein

ruton ka KHun nichoD den ye waqt ki pukar hai