purane KHwab

sunī sunī sī lagī hai mujh ko

vo sardiyoñ meñ lihāf oḌhe hue kahānī

kahīñ alaav ke gird chalte hue vo qisse saroñ pe apne añgochhe bāñdhe hue vo qisse

alaav ke gird jalte bujhte hue vo qisse kahīñ pe shahzādiyoñ ke qisse

kahīñ parindoñ kī khichḌiyoñ kī vahī kahānī

vo ek chiḌā jo khā gayā thā tamām khichḌī

kahīñ namak sī kahīñ mirch sī

kabhī vo mīThī khaTā.ī jaisī na.ī kahānī

bahut purānī sī baat hai ye

na ab alaav ke gird mela

na chiḌiyā chiḌe kī vo kahānī

namak kī ḳhātir na shāhzādī ne dukh uThā.e

vo shāhzāda jo jañgaloñ meñ talāsh kartā rahā thā paanī

vahīñ pe us ko parī milī thī

tamām jañgal bhī kaT chuke haiñ

sirāj anvar ke saare jañgal kahīñ nahīñ haiñ

vo saarī pariyāñ bhī so ga.ī haiñ

na shahzāde

na koī jaadū bharī kahānī kahāñ haiñ nastor ke vo qisse

jo haath apnā baḌhā ke dāvāt khīñchtā thā

bas ab to vo daur bhī ḳhatm hai

nahīñ haiñ bachchoñ ke vo risāle

khilaunā phulvārī sharīr laḌkā

na moTū patlū ke pyāre qisse

bas ab to ḳhabreñ dahāḌtī haiñ

suni suni si lagi hai mujh ko

wo sardiyon mein lihaf oDhe hue kahani

kahin alaw ke gird chalte hue wo qisse saron pe apne angochhe bandhe hue wo qisse

alaw ke gird jalte bujhte hue wo qisse kahin pe shahzadiyon ke qisse

kahin parindon ki khichDiyon ki wahi kahani

wo ek chiDa jo kha gaya tha tamam khichDi

kahin namak si kahin mirch si

kabhi wo miThi khaTai jaisi nai kahani

bahut purani si baat hai ye

na ab alaw ke gird mela

na chiDiya chiDe ki wo kahani

namak ki KHatir na shahzadi ne dukh uThae

wo shahzada jo jangalon mein talash karta raha tha pani

wahin pe us ko pari mili thi

tamam jangal bhi kaT chuke hain

siraj anwar ke sare jangal kahin nahin hain

wo sari pariyan bhi so gai hain

na shahzade

na koi jadu bhari kahani kahan hain nastor ke wo qisse

jo hath apna baDha ke dawat khinchta tha

bas ab to wo daur bhi KHatm hai

nahin hain bachchon ke wo risale

khilauna phulwari sharir laDka

na moTu patlu ke pyare qisse

bas ab to KHabren dahaDti hain