pursa

ek muddat se jo ḳhadsha thā vahī baat huī

Dhal ga.ī shaam sahar ruuTh ga.ī raat huī

aaj kī sub.h añdheroñ ko bhī laa.ī hamrāh

maut ke zahr se peshānī-e-hastī hai siyāh

ik thake-hāre musāfir ke qadam TuuT ga.e

aable paañv ke manzil ke qarīñ phuuT ga.e

jis tarah dāman-e-shab meñ koī taarā TuuTā

gardish-e-vaqt ke hāthoñ se bhī sāġhar chhūTā

phuul murjhā ga.e shabnam ne bahā.e aañsū

chhīn lī vaqt ne ik phuul se us kī ḳhushbū

gul huī sham.a dhuāñ uTThā siyāhī chhā.ī

zindagānī kī jahāñ-tāb kiran kajlā.ī

aap jab hañstī haiñ hañstā rahā gulshan merā

aap rotī haiñ to bhīgā kiyā dāman merā

maiñ bhī mānūs huuñ kuchh aise hī dard-o-ġham se

merā dāman bhī to vābasta hai chashm-e-nam se

palkeñ jab bhīgīñ to koī bhī na aañsū poñchhā

koī dāman bhī na thā koī bhī āñchal na baḌhā

aaj mil jā.egā shāyad yahāñ ashkoñ kā sila

hadiya-e-ashk maiñ laayā huuñ ba-nām-e-pursa

ek muddat se jo KHadsha tha wahi baat hui

Dhal gai sham sahar ruTh gai raat hui

aaj ki subh andheron ko bhi lai hamrah

maut ke zahr se peshani-e-hasti hai siyah

ek thake-haare musafir ke qadam TuT gae

aable panw ke manzil ke qarin phuT gae

jis tarah daman-e-shab mein koi tara TuTa

gardish-e-waqt ke hathon se bhi saghar chhuTa

phul murjha gae shabnam ne bahae aansu

chhin li waqt ne ek phul se us ki KHushbu

gul hui shama dhuan uTTha siyahi chhai

zindagani ki jahan-tab kiran kajlai

aap jab hansti hain hansta raha gulshan mera

aap roti hain to bhiga kiya daman mera

main bhi manus hun kuchh aise hi dard-o-gham se

mera daman bhi to wabasta hai chashm-e-nam se

palken jab bhigin to koi bhi na aansu ponchha

koi daman bhi na tha koi bhi aanchal na baDha

aaj mil jaega shayad yahan ashkon ka sila

hadiya-e-ashk main laya hun ba-nam-e-pursa