pyasa unT

jis vaqt mahār uThā.ī thī merā uuñT bhī pyāsā thā

mashkīze meñ ḳhuun bharā thā aañkh meñ sahrā phailā thā

ḳhushk babūloñ kī shāḳhoñ par saañp ne halqe Daale the

jin kī surḳh zabānoñ se pattoñ ne zahr kashīd kiyā

kaalī gardan piilī āñkhoñ vaalī ban kī ek chuḌail

niile panjoñ vaale nāḳhun jin ke andar chiknā mail

ek kaTorā ḳhushk lahū kā us meñ lākhoñ reñgte bichchhū

ham donoñ ne tez kiye the uupar nīche vaale daañt

ḳhushk lahū ko kaaT ke khāyā aur piyā phir mashkīza

us ke ba.ad achānak dekhā sahrā ḳhuun kā dariyā thā

maiñ aur Dāyan saañp aur bichchhū sab kuchh us meñ Duub rahe the

lekin uuñT vo pyāsā merā ham se Dar kar bhaag gayā

jis waqt mahaar uThai thi mera unT bhi pyasa tha

mashkize mein KHun bhara tha aankh mein sahra phaila tha

KHushk babulon ki shaKHon par sanp ne halqe Dale the

jin ki surKH zabanon se patton ne zahr kashid kiya

kali gardan pili aankhon wali ban ki ek chuDail

nile panjon wale naKHun jin ke andar chikna mail

ek kaTora KHushk lahu ka us mein lakhon rengte bichchhu

hum donon ne tez kiye the upar niche wale dant

KHushk lahu ko kaT ke khaya aur piya phir mashkiza

us ke baad achanak dekha sahra KHun ka dariya tha

main aur Dayan sanp aur bichchhu sab kuchh us mein Dub rahe the

lekin unT wo pyasa mera hum se Dar kar bhag gaya