qaid-e-azam

aadam kī tārīḳh ke siine meñ Duube haiñ

kitne sūraj kitne chāñd

kaise kaise rang the miTTī se phūTe

mauj havā ke bante aur bigaḌte rastoñ meñ Thahre

aur ḳhaak hue

niile aur athāh samundar ke hoñToñ kī pyaas bane

aane vaale din kī āñkhoñ meñ lahrātī aas bane

kaise kaise rang the jo miTTī se chamke

aur chamak kar paḌ ga.e maañd

kuchh sūraj aise phir bhī

apnī apnī shaam meñ jo is dasht-e-ufuq kā rizq hue haiñ

lekin ab tak raushan haiñ gahnā.e nahīñ

phuul haiñ jin ko chhūne vaalī sabz havā.eñ ḳhaak huiiñ

lekin ab tak taaza haiñ kumhlā.e nahīñ

aisā hī ik sūraj thā vo ādam-zāda

TuuTī īñToñ ke malbe se jaada jaada

TukḌā TukḌā yakjā kar ke

ek imārat kī buniyādeñ Daal rahā thā

saat samundar jaise dil meñ

un ke ġham ko paal rahā thā

jin ke kaale tañg gharoñ meñ koī sūraj chāñd nahīñ thā

phūloñ kī mahkār nahīñ thī bādal kā imkān nahīñ thā

sub.h kā naam nishān nahīñ thā

niiñd bharī āñkhoñ ke lawn meñ

vo ḳhud sūraj ban kar ubhrā

Dhaltī shab meñ puure chāñd kī sūrat niklā

sub.h ke pahle darvāze par dastak ban kar guuñj uThā

aaj maiñ jis manzil par khaḌā huuñ

us par pīchhe muḌ kar dekhūñ

to ik raushan moḌ pe ab bhī

vo hāthoñ meñ

aane vaale din kī jaltī sham.a thāme

merī jānib dekh rahā hai

jaane kyā vo soch rahā hai

aadam ki tariKH ke sine mein Dube hain

kitne suraj kitne chand

kaise kaise rang the miTTi se phuTe

mauj hawa ke bante aur bigaDte raston mein Thahre

aur KHak hue

nile aur athah samundar ke honTon ki pyas bane

aane wale din ki aankhon mein lahraati aas bane

kaise kaise rang the jo miTTi se chamke

aur chamak kar paD gae mand

kuchh suraj aise phir bhi

apni apni sham mein jo is dasht-e-ufuq ka rizq hue hain

lekin ab tak raushan hain gahnae nahin

phul hain jin ko chhune wali sabz hawaen KHak huin

lekin ab tak taza hain kumhlae nahin

aisa hi ek suraj tha wo aadam-zada

TuTi inTon ke malbe se jada jada

TukDa TukDa yakja kar ke

ek imarat ki buniyaaden Dal raha tha

sat samundar jaise dil mein

un ke gham ko pal raha tha

jin ke kale tang gharon mein koi suraj chand nahin tha

phulon ki mahkar nahin thi baadal ka imkan nahin tha

subh ka nam nishan nahin tha

nind bhari aankhon ke lawn mein

wo KHud suraj ban kar ubhra

Dhalti shab mein pure chand ki surat nikla

subh ke pahle darwaze par dastak ban kar gunj uTha

aaj main jis manzil par khaDa hun

us par pichhe muD kar dekhun

to ek raushan moD pe ab bhi

wo hathon mein

aane wale din ki jalti shama thame

meri jaanib dekh raha hai

jaane kya wo soch raha hai