qatil

diary roz bulātī hai mujhe likhne ko

ek muddat se koī sher nahīñ likkhā hai

mire siine meñ bhī ik dard uThā jaatā hai

terī yādeñ bhī bahut zehn meñ chillātī haiñ

pen kāġhaz maiñ luuñ

aur koī nayā sher likhūñ

baiTh jaatā huuñ so maiñ diary apnī le kar

misre likhtā huuñ

miTātā huuñ

maiñ phir likhtā huuñ

pheñk detā huuñ phir un misroñ ke kāġhaz ko maiñ golā kar ke

phir mire kamre se

aahoñ kī sadā aatī hai

dekhtā huuñ

to vahī saare adhūre misre

dustbin meñ paḌe dam toḌ rahe hote haiñ

maiñ pas-o-pesh meñ paḌ jaatā huuñ

us lamha tab

aur samajh meñ nahīñ aatā hai mujhe itnā bhī

maiñ ke shā.er huuñ koī

yā ke koī qātil huuñ

diary roz bulati hai mujhe likhne ko

ek muddat se koi sher nahin likkha hai

mere sine mein bhi ek dard uTha jata hai

teri yaaden bhi bahut zehn mein chillati hain

pen kaghaz main lun

aur koi naya sher likhun

baiTh jata hun so main diary apni le kar

misre likhta hun

miTata hun

main phir likhta hun

phenk deta hun phir un misron ke kaghaz ko main gola kar ke

phir mere kamre se

aahon ki sada aati hai

dekhta hun

to wahi sare adhure misre

dustbin mein paDe dam toD rahe hote hain

main pas-o-pesh mein paD jata hun

us lamha tab

aur samajh mein nahin aata hai mujhe itna bhi

main ke shaer hun koi

ya ke koi qatil hun