qahat-sali mein eid

kahte haiñ eid hai aaj apnī bhī eid hotī

bahbūd-e-mulk kī gar ham ko umiid hotī

haale meñ chāñd gar kal ham ko dikhā.ī detā

qufl-e-ḳhazāna apnā apnī kalīd hotī

uf be-zarī kā aalam allah re qahat-sālī

kyā ḳhaak eid hotī kyā ḳhaak eid hotī

kaTte agar na hindī talvār-e-muflisī se

ye eid ham-damoñ phir be-shak sa.iid hotī

karte agar tavajjoh mulkī muāmloñ par

jo koī baat hotī apne mufīd hotī

hukkām chāheñ jo kuchh dil meñ ḳhayāl kar leñ

thī baat tab ki bāham guft-o-shunīd hotī

logoñ ne kar diyā hai kyoñ chāñd ko muqaddam

gar ham 'falak’ na hote kis tarah eid hotī

kahte hain eid hai aaj apni bhi eid hoti

bahbud-e-mulk ki gar hum ko umid hoti

haale mein chand gar kal hum ko dikhai deta

qufl-e-KHazana apna apni kalid hoti

uf be-zari ka aalam allah re qahat-sali

kya KHak eid hoti kya KHak eid hoti

kaTte agar na hindi talwar-e-muflisi se

ye eid ham-damon phir be-shak said hoti

karte agar tawajjoh mulki muamlon par

jo koi baat hoti apne mufid hoti

hukkaam chahen jo kuchh dil mein KHayal kar len

thi baat tab ki baham guft-o-shunid hoti

logon ne kar diya hai kyon chand ko muqaddam

gar hum 'falak’ na hote kis tarah eid hoti