qahqaha

qahqaha kis ne ījād kiyā

tahqīq jaarī hai

muskurāte mausam meñ

bādaloñ ke gole aThkheliyāñ karte hue

sūraj ke sāmne aa.eñ

to lagtā hai

āsmāñ raqs meñ hai

sañglāḳh pahāḌoñ ke dāmanī chashmoñ ke

sur sun liye hoñge

yā phir kisī shāhzādī ne

muddat baad khule meñ añgḌā.ī lī hogī

āsmān pe rang

yūñhī nahīñ bikhre

ḳhayāl kahāñ chalā gayā

qahqahe pe tahqīq jaarī thī

ye be-sāḳhta ḳhushī kā saaz hai

kisī bhaTakte hue musāfir ko man-chāhī manzil mil jaa.e to qahqaha

yā phir lā-hāsil ko hāsil karne pe qahqaha

mazlūm ko insāf milā to qahqaha

ḳhushī ke saat rangoñ pe haavī hai kyā āTHvāñ qahqaha

nahīñ nahīñ hargiz nahīñ

ḳhushī ke sāz-o-sur hī alag haiñ

qahqaha to dard kī ījād hai

dard ne jab saarī sīḌhiyāñ ubuur kar liiñ

aziyyat se hotā huā vahshat meñ dāḳhil huā

yuuñ banā qahqaha

qahqaha kis ne ijad kiya

tahqiq jari hai

muskuraate mausam mein

baadalon ke gole aThkheliyan karte hue

suraj ke samne aaen

to lagta hai

aasman raqs mein hai

sanglaKH pahaDon ke damani chashmon ke

sur sun liye honge

ya phir kisi shahzadi ne

muddat baad khule mein angDai li hogi

aasman pe rang

yunhi nahin bikhre

KHayal kahan chala gaya

qahqahe pe tahqiq jari thi

ye be-saKHta KHushi ka saz hai

kisi bhaTakte hue musafir ko man-chahi manzil mil jae to qahqaha

ya phir la-hasil ko hasil karne pe qahqaha

mazlum ko insaf mila to qahqaha

KHushi ke sat rangon pe hawi hai kya aaTHwan qahqaha

nahin nahin hargiz nahin

KHushi ke saz-o-sur hi alag hain

qahqaha to dard ki ijad hai

dard ne jab sari siDhiyan ubur kar lin

aziyyat se hota hua wahshat mein daKHil hua

yun bana qahqaha