qaid-e-ba-mashaqqat

yūñhī kabhī kabhī

sanglāḳh chaTTānoñ se guzarte hue

ik lahrātā huā dariyā soch meñ utar aa.e to

mujhe kamzor na samajhnā

zindagī ab to taqrīban aadī ho chukī hai

dīvāroñ se baat karne kī

un ke biich agar kabhī koī chehra dikhā.ī paḌ jaa.e

to mujhe vahmī na samajhnā

chhoTī chhoTī rifāqateñ sañbhāl rakhne vaale

jab rishtoñ ke naam par piile paḌ jaa.eñ

to unheñ muaaf kar denā chāhiye

tanhā rahne kī achchhī aadat banāne meñ

Dher saarī burī ādatoñ ko tyāgnā paḌtā hai

mīThe shabdoñ ko tah meñ utar kar

zahr kī būñdeñ talāsh karnī paḌtī haiñ

saare chehroñ ko ulaT palaT kar paḌhnā paḌtā hai

sachchā.ī se bhāgte hue

ulTe qadmoñ use chhū kar

aag se guzarne kā ānand lenā paḌtā hai

itnī mehnat ke baa'd

agar koī bharpūr jī rahā ho

to us kī sāñseñ ginñe ke bajā.e

us kī umr naap lenā

yunhi kabhi kabhi

sanglaKH chaTTanon se guzarte hue

ek lahraata hua dariya soch mein utar aae to

mujhe kamzor na samajhna

zindagi ab to taqriban aadi ho chuki hai

diwaron se baat karne ki

un ke bich agar kabhi koi chehra dikhai paD jae

to mujhe wahmi na samajhna

chhoTi chhoTi rifaqaten sanbhaal rakhne wale

jab rishton ke nam par pile paD jaen

to unhen muaf kar dena chahiye

tanha rahne ki achchhi aadat banane mein

Dher sari buri aadaton ko tyagna paDta hai

miThe shabdon ko tah mein utar kar

zahr ki bunden talash karni paDti hain

sare chehron ko ulaT palaT kar paDhna paDta hai

sachchai se bhagte hue

ulTe qadmon use chhu kar

aag se guzarne ka aanand lena paDta hai

itni mehnat ke ba'd

agar koi bharpur ji raha ho

to us ki sansen ginne ke bajae

us ki umr nap lena