qaid-e-hayat o band-e-gham

āḳhir-e-shab kī udāsī nam fazāoñ kā sukūt

zaḳhm se mahtāb ke ristā hai kirnoñ kā lahū

dil kī vaadī par hai be-mausam ghaTāoñ kā sukūt

kaash koī ġham-gusār aa.e madārāteñ kare

mom-battī kī pighaltī raushnī ke karb meñ

dukh bhare naġhme sunā.e dukh bharī bāteñ kare

koī afsāna kisī TuuTī huī mizrāb kā

fasl-e-gul meñ rā.egāñ arz-e-hunar jaane kī baat

siip ke pahlū se motī ke judā hone kā zikr

mauj kī sāhil se Takrā kar bikhar jaane kī baat

dīda-e-pur-ḳhūñ se kaasa tak kī manzil kā bayāñ

zindagānī meñ hazāroñ baar mar jaane kī baat

adl-gāh-e-ḳhair meñ pāsañg-e-shar kā tazkira

ā.īna-ḳhāne meñ ḳhāl-o-ḳhat se Dar jaane kī baat

kaash koī ġham-gusār aa.e madārāteñ kare

mom-battī kī pighaltī raushnī ke karb meñ

dukh bhare naġhme sunā.e dukh bharī bāteñ kare

aaKHir-e-shab ki udasi nam fazaon ka sukut

zaKHm se mahtab ke rista hai kirnon ka lahu

dil ki wadi par hai be-mausam ghaTaon ka sukut

kash koi gham-gusar aae madaraaten kare

mom-batti ki pighalti raushni ke karb mein

dukh bhare naghme sunae dukh bhari baaten kare

koi afsana kisi TuTi hui mizrab ka

fasl-e-gul mein raegan arz-e-hunar jaane ki baat

sip ke pahlu se moti ke juda hone ka zikr

mauj ki sahil se Takra kar bikhar jaane ki baat

dida-e-pur-KHun se kasa tak ki manzil ka bayan

zindagani mein hazaron bar mar jaane ki baat

adl-gah-e-KHair mein pasang-e-shar ka tazkira

aaina-KHane mein KHal-o-KHat se Dar jaane ki baat

kash koi gham-gusar aae madaraaten kare

mom-batti ki pighalti raushni ke karb mein

dukh bhare naghme sunae dukh bhari baaten kare