qalam

ai qalam kyā kahūñ maiñ sehr-bayānī terī

hāl-e-dil apnā sunātā huuñ zabānī terī

tū khilātā hai na.e gul jo ravāñ hotā hai

rang ye shāḳh-e-gul-e-tar meñ kahāñ hotā hai

terī āvāz hai kānoñ ko sarīr-e-dilkash

sau tarānoñ se hai behtar ye nafīr-e-dilkash

ik jahāñ par hai tasallut tirā qabza terā

har zamāne meñ chalā kartā hai sikka terā

zauq hai jin ko samajhte haiñ vo tauqīr terī

chuTkiyāñ dil meñ liyā kartī hai tahrīr terī

baḌh ke e.ajāz se hai sehr-nigārī terī

naqsh-e-dilkash meñ tire shakl hai pyārī terī

kabhī do lafzoñ meñ rotoñ ko hañsā detā hai

hañsne vāloñ ko kabhī tū hī rulā detā hai

ham ne bachte na sunā ek bhī maarā terā

jo hai talvār vo hai māntī lohā terā

terī raftār se dil vaqf-e-alam hote haiñ

terī jumbish se sar aksar ke qalam hote haiñ

bhejtā hai kabhī paiġhām-e-mohabbat tū hī

dil-e-maġhmūm ko hai bā.is-e-hujjat tū hī

dushman-e-jān-e-hazīñ īsā-e-daurāñ tū hai

samm-e-qātil hai kabhī chashma-e-haivāñ tū hai

koī kis tarah kahe aaj se kal se tū hai

sab ko taslīm ye hai roz-e-azal se tū hai

ḳhatm tā-hashr nahīñ hogā kabhī kaam terā

saf.ha-e-dahr se miTne kā nahīñ naam terā

jitnī duniyā meñ kitābeñ haiñ raqam kiiñ tū ne

jalva-afroz nazar pyāre qalam kiiñ tū ne

terī jumbish kā natīja haiñ ye daftar lākhoñ

naqsh-e-ḳhush-rang ke mamnūn haiñ patthar lākhoñ

terā likkhā huā merā ḳhat-e-taqdīr bhī hai

kyā kahūñ lauh-e-jabīñ par tirī tahrīr bhī hai

do-jahāñ meñ hai laqab ḳhāma-e-qudrat terā

allah allāh ye hai pāya-e-rif.at terā

terī mamnūn mirī saiñkaḌoñ tahrīreñ haiñ

terī khīñchī huī ḳhush-rang vo tasvīreñ haiñ

ai qalam rishta-e-ulfat tirā TuuTe na kabhī

haath se 'bāsit'-e-ranjūr ke chhūTe na kabhī

ai qalam kya kahun main sehr-bayani teri

haal-e-dil apna sunata hun zabani teri

tu khilata hai nae gul jo rawan hota hai

rang ye shaKH-e-gul-e-tar mein kahan hota hai

teri aawaz hai kanon ko sarir-e-dilkash

sau taranon se hai behtar ye nafir-e-dilkash

ek jahan par hai tasallut tera qabza tera

har zamane mein chala karta hai sikka tera

zauq hai jin ko samajhte hain wo tauqir teri

chuTkiyan dil mein liya karti hai tahrir teri

baDh ke eajaz se hai sehr-nigari teri

naqsh-e-dilkash mein tere shakl hai pyari teri

kabhi do lafzon mein roton ko hansa deta hai

hansne walon ko kabhi tu hi rula deta hai

hum ne bachte na suna ek bhi mara tera

jo hai talwar wo hai manti loha tera

teri raftar se dil waqf-e-alam hote hain

teri jumbish se sar aksar ke qalam hote hain

bhejta hai kabhi paigham-e-mohabbat tu hi

dil-e-maghmum ko hai bais-e-hujjat tu hi

dushman-e-jaan-e-hazin isa-e-dauran tu hai

samm-e-qatil hai kabhi chashma-e-haiwan tu hai

koi kis tarah kahe aaj se kal se tu hai

sab ko taslim ye hai roz-e-azal se tu hai

KHatm ta-hashr nahin hoga kabhi kaam tera

safha-e-dahr se miTne ka nahin nam tera

jitni duniya mein kitaben hain raqam kin tu ne

jalwa-afroz nazar pyare qalam kin tu ne

teri jumbish ka natija hain ye daftar lakhon

naqsh-e-KHush-rang ke mamnun hain patthar lakhon

tera likkha hua mera KHat-e-taqdir bhi hai

kya kahun lauh-e-jabin par teri tahrir bhi hai

do-jahan mein hai laqab KHama-e-qudrat tera

allah allah ye hai paya-e-rifat tera

teri mamnun meri sainkaDon tahriren hain

teri khinchi hui KHush-rang wo taswiren hain

ai qalam rishta-e-ulfat tera TuTe na kabhi

hath se 'basit'-e-ranjur ke chhuTe na kabhi