qarz

ik adn jal rahā thā nigahbāñ ḳhudā

us ghaḌī sātveñ āsmāñ par na thā

aur azal se abad tak ahāta kiye

ek af.ī kī manhūs āvāz thī

aur ḳhudā mere shām-o-sahar meñ na thā

mere ghar meñ na thā

aur ḳhudā

jo dabe paañv khiḌkī se pīchhe haTā

jo mire saath suunī saḌak par rukā

yak-ba-yak munfa.il hichkiyoñ meñ bikharne lagā

ik jalāl-e-ravāñ mere hamrāh galiyoñ meñ chalne lagā

aur ḳhajālat kī ye raat

ik sard patthar pe takiya kiye

merī bāñhoñ meñ bāñheñ diye

mere ma.abūd ne

qaharmāñ karb meñ kaaT dī

aur adn jal bujhā

zul-jalāl āñsuoñ ke tufail aaj bhī

har nafas ik sulagtā huā farz hai

ik nayā ghar muqaddas gharoñ kī qasam

mere ma.abūd par aaj bhī qarz hai

ek adn jal raha tha nigahban KHuda

us ghaDi satwen aasman par na tha

aur azal se abad tak ahata kiye

ek afi ki manhus aawaz thi

aur KHuda mere sham-o-sahar mein na tha

mere ghar mein na tha

aur KHuda

jo dabe panw khiDki se pichhe haTa

jo mere sath suni saDak par ruka

yak-ba-yak munfail hichkiyon mein bikharne laga

ek jalal-e-rawan mere hamrah galiyon mein chalne laga

aur KHajalat ki ye raat

ek sard patthar pe takiya kiye

meri banhon mein banhen diye

mere mabud ne

qaharman karb mein kaT di

aur adn jal bujha

zul-jalal aansuon ke tufail aaj bhi

har nafas ek sulagta hua farz hai

ek naya ghar muqaddas gharon ki qasam

mere mabud par aaj bhi qarz hai