qarz

merā baap nangā thā

maiñ ne apne kapḌe utaar kar use de diye

zamīn bhī nangī thī

maiñ ne use

apne makān se daaġh diyā

sharm bhī nangī thī maiñ ne use āñkheñ diiñ

pyaas ko lams diye

aur hoñToñ kī kyārī meñ

jaane vaale ko bo diyā

mausam chāñd liye phir rahā thā

maiñ ne mausam ko daaġh de kar chāñd ko āzād kiyā

chitā ke dhueñ se maiñ ne insān banāyā

aur us ke sāmne apnā man rakhā

us kā lafz jo us ne apnī paidā.ish pe chunā

aur bolā

maiñ terī kokh meñ ek hairat dekhtā huuñ

mere badan se aag duur huī

to maiñ ne apne gunāh taap liye

maiñ maañ banñe ke baa'd bhī kuñvārī huī

aur merī maañ bhī kuñvārī huī

ab tum kuñvārī maañ kī hairat ho

maiñ chitā pe saare mausam jalā Dālūñgī

maiñ ne tujh meñ ruuh phūñkī

maiñ tere mausamoñ meñ chuTkiyāñ bajāne vaalī huuñ

miTTī kyā sochegī

miTTī chhāñv sochegī aur ham miTTī ko socheñge

terā inkār mujhe zindagī detā hai

ham peḌoñ ke azaab saheñ

yā dukhoñ ke phaTe kapḌe pahneñ

mera bap nanga tha

main ne apne kapDe utar kar use de diye

zamin bhi nangi thi

main ne use

apne makan se dagh diya

sharm bhi nangi thi main ne use aankhen din

pyas ko lams diye

aur honTon ki kyari mein

jaane wale ko bo diya

mausam chand liye phir raha tha

main ne mausam ko dagh de kar chand ko aazad kiya

chita ke dhuen se main ne insan banaya

aur us ke samne apna man rakha

us ka lafz jo us ne apni paidaish pe chuna

aur bola

main teri kokh mein ek hairat dekhta hun

mere badan se aag dur hui

to main ne apne gunah tap liye

main man banne ke ba'd bhi kunwari hui

aur meri man bhi kunwari hui

ab tum kunwari man ki hairat ho

main chita pe sare mausam jala Dalungi

main ne tujh mein ruh phunki

main tere mausamon mein chuTkiyan bajaane wali hun

miTTi kya sochegi

miTTi chhanw sochegi aur hum miTTi ko sochenge

tera inkar mujhe zindagi deta hai

hum peDon ke azab sahen

ya dukhon ke phaTe kapDe pahnen