qasam

zulf mahkī huī jagmagātī jabīñ

chehra damkā huā aañkh hai surmagīñ

haath mehñdī rachī hoñT bhī ahmarīñ

husn aur husn kī is adā kī qasam

aaj aa.egī shāyad qayāmat kahīñ

aaj har phuul jaise kiran phuul hai

aaj sarkār kā har suḳhan phuul hai

aarzū ek ḳhushbū badan phuul hai

saath detī huī is fazā kī qasam

aaj dam legī jalvoñ kī shiddat kahīñ

husn-e-ḳhud-bīñ sahī husn-e-tanhā nahīñ

sham.a jaisī bhī ho bin patangā nahīñ

in dinoñ ahl-e-dil kā bharosā nahīñ

dekhnā is machaltī hayā kī qasam

aa na jaa.e kisī kī tabī.at kahīñ

aaj jo bhī adā hai vo manzūm hai

phir bhī ye husn-e-bā-zauq ma.asūm hai

aaj kaisā zamāna hai ma.alūm hai

vaqt kī bahkī bahkī havā kī qasam

luT na jaa.e gul-e-nau kī azmat kahīñ

zulf mahki hui jagmagati jabin

chehra damka hua aankh hai surmagin

hath mehndi rachi honT bhi ahmarin

husn aur husn ki is ada ki qasam

aaj aaegi shayad qayamat kahin

aaj har phul jaise kiran phul hai

aaj sarkar ka har suKHan phul hai

aarzu ek KHushbu badan phul hai

sath deti hui is faza ki qasam

aaj dam legi jalwon ki shiddat kahin

husn-e-KHud-bin sahi husn-e-tanha nahin

shama jaisi bhi ho bin patanga nahin

in dinon ahl-e-dil ka bharosa nahin

dekhna is machalti haya ki qasam

aa na jae kisi ki tabiat kahin

aaj jo bhi ada hai wo manzum hai

phir bhi ye husn-e-ba-zauq masum hai

aaj kaisa zamana hai malum hai

waqt ki bahki bahki hawa ki qasam

luT na jae gul-e-nau ki azmat kahin