qatl-e-aftab

shafaq ke rañg meñ hai qatl-e-āftāb kā rañg

ufuq ke dil meñ hai ḳhanjar lahū-luhān hai shaam

safed shīsha-e-nūr aur siyāh bārish-e-sañg

zamīñ se tā-ba-falak hai buland raat kā naam

yaqīñ kā zikr hī kyā hai ki ab gumāñ bhī nahīñ

maqām-e-dard nahīñ manzil-e-fuġhāñ bhī nahīñ

vo be-hisī hai ki jo qābil-e-bayāñ bhī nahīñ

koī tarañg hī baaqī rahī na koī umañg

jabīn-e-shauq nahīñ sañg-e-āstāñ bhī nahīñ

raqīb jiit ga.e ḳhatm ho chukī hai jañg

diloñ meñ shola-e-ġham bujh gayā hai kyā kiije

koī hasīn nahīñ kis se ab vafā kiije

sivā.e is ke ki qātil hī ko duā diije

magar ye jañg nahīñ vo jo ḳhatm ho jaa.e

ik intihā hai faqat husn-e-ibtidā ke liye

bichhe haiñ ḳhaar ki guzreñge qāfile gul ke

ḳhamoshī mohr-ba-lab hai kisī sadā ke liye

udāsiyāñ haiñ ye sab naġhma-o-navā ke liye

vo pahnā sham.a ne phir ḳhūn-e-āftāb kā taaj

sitāre le ke uThe nūr-e-āftāb ke jaam

palak palak pe firozāñ haiñ āñsuoñ ke charāġh

laveñ lachaktī haiñ yā bijliyāñ chamaktī haiñ

tamām pairahan-e-shab meñ bhar ga.e haiñ sharār

hazār lab se zamīñ kah rahī hai qissa-e-dard

hazār gosh-e-junūñ sun rahe haiñ afsāna

chaTak rahī haiñ kahīñ tīrgī kī dīvāreñ

lachak rahī haiñ kahīñ shāḳh-e-gul kī talvāreñ

sanak rahī hai kahīñ dasht-e-sar-kashī meñ havā

chahak rahī hai kahīñ bulbul-e-bahār-navā

mahak rahā hai vafā ke chaman meñ dil kā gulāb

chhalak rahī hai lab o aariz o nazar kī sharāb

javān ḳhvāboñ ke jañgal se aa rahī hai nasīm

nafas meñ nik.hat-e-paiġhām-e-inqalāb liye

ḳhabar hai qāfila-e-rañg-o-nūr niklegā

sahar ke dosh pe ik taaza āftāb liye

shafaq ke rang mein hai qatl-e-aftab ka rang

ufuq ke dil mein hai KHanjar lahu-luhan hai sham

safed shisha-e-nur aur siyah barish-e-sang

zamin se ta-ba-falak hai buland raat ka nam

yaqin ka zikr hi kya hai ki ab guman bhi nahin

maqam-e-dard nahin manzil-e-fughan bhi nahin

wo be-hisi hai ki jo qabil-e-bayan bhi nahin

koi tarang hi baqi rahi na koi umang

jabin-e-shauq nahin sang-e-astan bhi nahin

raqib jit gae KHatm ho chuki hai jang

dilon mein shola-e-gham bujh gaya hai kya kije

koi hasin nahin kis se ab wafa kije

siwae is ke ki qatil hi ko dua dije

magar ye jang nahin wo jo KHatm ho jae

ek intiha hai faqat husn-e-ibtida ke liye

bichhe hain KHar ki guzrenge qafile gul ke

KHamoshi mohr-ba-lab hai kisi sada ke liye

udasiyan hain ye sab naghma-o-nawa ke liye

wo pahna shama ne phir KHun-e-aftab ka taj

sitare le ke uThe nur-e-aftab ke jam

palak palak pe firozan hain aansuon ke charagh

lawen lachakti hain ya bijliyan chamakti hain

tamam pairahan-e-shab mein bhar gae hain sharar

hazar lab se zamin kah rahi hai qissa-e-dard

hazar gosh-e-junun sun rahe hain afsana

chaTak rahi hain kahin tirgi ki diwaren

lachak rahi hain kahin shaKH-e-gul ki talwaren

sanak rahi hai kahin dasht-e-sar-kashi mein hawa

chahak rahi hai kahin bulbul-e-bahaar-nawa

mahak raha hai wafa ke chaman mein dil ka gulab

chhalak rahi hai lab o aariz o nazar ki sharab

jawan KHwabon ke jangal se aa rahi hai nasim

nafas mein nikhat-e-paigham-e-inqalab liye

KHabar hai qafila-e-rang-o-nur niklega

sahar ke dosh pe ek taza aaftab liye