qatl-e-charaghan

aaj phir qatl-e-charāġhāñ kā ye manzar dekho

aaj phir ḳhaak sī uḌtī hai chaman-zāroñ meñ

phūTā phir ḳhuun kā sotā kahīñ kohsāroñ meñ

aaj phir maqtal-e-insāñ pe baḌī raunaq hai

aaj phir sūrat-e-shaitāñ pe baḌī raunaq hai

kuchh dhamākoñ ne jo tasvīr badal Daalī hai

ḳhaak bhī ḳhaak nahīñ hai yahāñ ab laale hai

ban ke kaun aayā hai ab nau-e-bashar kā dushman

jis ki nafrat kā nishāna bane haiñ ġhuncha dahan

godiyāñ ujḌī haiñ jin maaoñ kī pūchho un se

chauñk uThtī haiñ vo rah rah ke har ik dastak pe

kone kone se jo bachchoñ ki sadā aatī hai

pāgaloñ ki tarah maañ DhūñDtī rah jaatī hai

dars-o-tadrīs ke mīnār girāne vaalo

nanhe māsūmoñ pe hathiyār uThāne vaalo

de sakoge hameñ kyā chand savāloñ ke javāb

tum ne jo zulm kiye kyā hai badal us kā savāl

tum ne ik nāra-e-takbīr lagāyā jis dam

khauf-e-allāh zarā bhī na huā dil pe raqam

zehn meñ tere na aayā ki haiñ bande us ke

jis ke nazdīk ibādat hai mohabbat sab se

tū ne maaoñ ke jigar-goshoñ ko maarā jis dam

haath kāñpe na tire dil na hue kyuuñ pur-nam

apne maz.hab ki ibādat kā bharam hai tujh ko

darja pā.egā shahādat kā bharam hai tujh ko

ik daf.a paḌh le agar vāqi.a-e-karb-o-balā

jaan jā.egā ki dar-asl ye islām hai kyā

tū ne qur.āñ jo sahīh taur se samjhā hotā

aaj tujh meñ bhī mohabbat kā salīqa hotā

aaj phir qatl-e-charaghan ka ye manzar dekho

aaj phir KHak si uDti hai chaman-zaron mein

phuTa phir KHun ka sota kahin kohsaron mein

aaj phir maqtal-e-insan pe baDi raunaq hai

aaj phir surat-e-shaitan pe baDi raunaq hai

kuchh dhamakon ne jo taswir badal Dali hai

KHak bhi KHak nahin hai yahan ab lale hai

ban ke kaun aaya hai ab nau-e-bashar ka dushman

jis ki nafrat ka nishana bane hain ghuncha dahan

godiyan ujDi hain jin maon ki puchho un se

chaunk uThti hain wo rah rah ke har ek dastak pe

kone kone se jo bachchon ki sada aati hai

pagalon ki tarah man DhunDti rah jati hai

dars-o-tadris ke minar girane walo

nanhe masumon pe hathiyar uThane walo

de sakoge hamein kya chand sawalon ke jawab

tum ne jo zulm kiye kya hai badal us ka sawal

tum ne ek nara-e-takbir lagaya jis dam

khauf-e-allah zara bhi na hua dil pe raqam

zehn mein tere na aaya ki hain bande us ke

jis ke nazdik ibaadat hai mohabbat sab se

tu ne maon ke jigar-goshon ko mara jis dam

hath kanpe na tere dil na hue kyun pur-nam

apne mazhab ki ibaadat ka bharam hai tujh ko

darja paega shahadat ka bharam hai tujh ko

ek dafa paDh le agar waqia-e-karb-o-bala

jaan jaega ki dar-asl ye islam hai kya

tu ne quran jo sahih taur se samjha hota

aaj tujh mein bhi mohabbat ka saliqa hota