qatra-e-shabnam

aah ai shabnam ke qatre terī hālat dekh kar

paanī ho ho kar bahe jaate haiñ mere dil jigar

umr kam ko saath ai nādān kyoñ laayā hai tū

ek shab ke vāste duniyā meñ kyā aaya hai tū

haa.e mil jā.eñge sab armān tere ḳhaak meñ

sub.h ab nazdīk hai sūraj hai terī taak meñ

be-sabātī aur phir aisī hazār afsos hai

zindagī-e-muḳhtasar par laakh baar afsos hai

dekh kar tujh ko nikal aa.e ye aañsū kis liye

chal gayā dil par hamāre terā jaadū kis liye

āb-dārī meñ hai baḌh-chaḌh kar dur-e-ġhaltāñ se tū

kyā mushābah hai kisī ke gauhar-e-dandāñ se tū

yā pasīna hai kisī māshūq ke ruḳhsār kā

yā koī qatra hai dūd-e-āh-e-ātish-bār kā

tujh meñ ye dil-bastagī aa.ī kahāñ se kyā hai tū

baaġh meñ jā kar jo dekho husn kā dariyā hai tū

god meñ lete haiñ tujh ko jaan tū phūloñ kī hai

tere dam se tere baa.is aabrū phūloñ kī hai

zard pattā ho gayā thā rū-e-pur-anvār-e-gul

sharm rakh lī tū ne ban kar ġhāza-e-ruḳhsār-e-gul

laila-e-shab baaġh meñ aatī hai din ko Taal kar

motiyoñ kā tere haar apne gale meñ Daal kar

phuul patte sabza-e-ḳhvābīda kī tū jaan hai

āb-dārī tujh pe sadqe tāzgī qurbān hai

paltī hai har ik kalī terī baġhal meñ raat bhar

rahtī bastī hai tire motī-mahal meñ raat bhar

al-ġharaz bālīdgī paudoñ kī terā kaam hai

chashma-e-āb-e-ḳhizar terī tarī kā naam hai

saarī raunaq gulshan-e-ālam kī tere dam se hai

tāzgī-e-sabza-o-gul qatra-e-shabnam se hai

aah ai shabnam ke qatre teri haalat dekh kar

pani ho ho kar bahe jate hain mere dil jigar

umr kam ko sath ai nadan kyon laya hai tu

ek shab ke waste duniya mein kya aaya hai tu

hae mil jaenge sab arman tere KHak mein

subh ab nazdik hai suraj hai teri tak mein

be-sabaati aur phir aisi hazar afsos hai

zindagi-e-muKHtasar par lakh bar afsos hai

dekh kar tujh ko nikal aae ye aansu kis liye

chal gaya dil par hamare tera jadu kis liye

aab-dari mein hai baDh-chaDh kar dur-e-ghaltan se tu

kya mushabah hai kisi ke gauhar-e-dandan se tu

ya pasina hai kisi mashuq ke ruKHsar ka

ya koi qatra hai dud-e-ah-e-atish-bar ka

tujh mein ye dil-bastagi aai kahan se kya hai tu

bagh mein ja kar jo dekho husn ka dariya hai tu

god mein lete hain tujh ko jaan tu phulon ki hai

tere dam se tere bais aabru phulon ki hai

zard patta ho gaya tha ru-e-pur-anwar-e-gul

sharm rakh li tu ne ban kar ghaza-e-ruKHsar-e-gul

laila-e-shab bagh mein aati hai din ko Tal kar

motiyon ka tere haar apne gale mein Dal kar

phul patte sabza-e-KHwabida ki tu jaan hai

aab-dari tujh pe sadqe tazgi qurban hai

palti hai har ek kali teri baghal mein raat bhar

rahti basti hai tere moti-mahal mein raat bhar

al-gharaz baalidgi paudon ki tera kaam hai

chashma-e-ab-e-KHizar teri tari ka nam hai

sari raunaq gulshan-e-alam ki tere dam se hai

tazgi-e-sabza-o-gul qatra-e-shabnam se hai