qatra jhil samundar

zamīñ pe baiTh kar koī

agar kahe

ki chāñd ek abrū-e-ḳhamīda kī misāl hai

to tū kahegā

dūri-e-nigāh meñ to ik savāl hai

ba-īñ dalīl

tujh se kah rahā thā maiñ

ki charḳh-e-nīl se

nigāh ko haTā zarā

simaTtī phailtī fazā-e-nīlgūñ ke dā.ere meñ

chand roz ke liye phisalnā chhoḌ kar

mire qarīb

is qadar qarīb aa

ki tere mere darmiyāñ

har ek fāsla miTe

to phir kahīñ tujhe patā chalegā ye

ki merī aañkh meñ

chamaktā qatra bhī nahīñ

chamaktī jhiil bhī nahīñ

ye bahr hai

ye bahr jis kī har machaltī lahr is sukūn kā payām hai

magar maiñ bhī Dartā huuñ

maiñ jāntā huuñ bahr-e-be-kanār meñ

ka.ī jagah bhañvar bhī haiñ

har ek lahr

ghūmte bhañvar ko dekhne ke vāste

uchhal uchhal ke mauj tund-o-tez bantī jā.egī

har ek mauj

ghūmte bhañvar ko bas meñ laane ke liye

baḌhegī

miTtī jā.egī

bhañvar ke dā.ere ko aur bhī baḌhā.egī

bhañvar jo aaj ghūmtā hai sail-e-rang-e-āb par

magar abhī sukūn hai

magar maiñ phir bhī Dartā huuñ

ki ye sukūñ talātum-e-nahufta kī dalīl hai

talātum-e-nahufta ke ḳhayāl se

farār chāhtā huuñ maiñ

lo aaj maiñ ne ek Dhang soch hī liyā

magar ye kaisī andhī soch hai

maiñ apnā haath aañkh par rakhe hue sitāda huuñ

har ek samt

soch kī hadoñ se duur

tīrgī meñ gahrā ik suhānā raaz hai

har ek ang

mast mast narm narm rāgnī kā saaz hai

magar maiñ phir bhī Dartā huuñ

ki ye sukūn sā.at-e-fatīla-e-hayāt hai

hayāt maiñ ġhalat samajh rahā thā itnī der se

hayāt is jagah kahāñ hayāt to

ufuq kī surḳhiyoñ se duur

ajnabī dayār meñ

vufūr-e-shauq ke tufail

farq-e-īñ-o-āñ ko chhoḌ kar

ek rang kā labāda oḌh kar

khaḌī hai mere intizār meñ

to kyoñ na maiñ vahāñ chalūñ

magar jab aage baḌhne

rasta dekhne ke vāste

maiñ apnā haath aañkh se haTātā huuñ

to apne aage ek bahr-e-be-karāñ ko paatā huuñ

magar ye kyā

ki tū to ab bhī kah rahā hai

terī aañkh meñ chamakte qatre kī misāl huuñ

tujhe ḳhabar nahīñ

ki ye sabhī ek dūri-e-nigāh kā savāl hai

zarā mire qarīb aa ke dekh merī aañkh meñ

chamaktā qatra bhī nahīñ

chamaktī jhiil bhī nahīñ

ye bahr hai

zamin pe baiTh kar koi

agar kahe

ki chand ek abru-e-KHamida ki misal hai

to tu kahega

duri-e-nigah mein to ek sawal hai

ba-in dalil

tujh se kah raha tha main

ki charKH-e-nil se

nigah ko haTa zara

simaTti phailti faza-e-nilgun ke daere mein

chand roz ke liye phisalna chhoD kar

mere qarib

is qadar qarib aa

ki tere mere darmiyan

har ek fasla miTe

to phir kahin tujhe pata chalega ye

ki meri aankh mein

chamakta qatra bhi nahin

chamakti jhil bhi nahin

ye bahr hai

ye bahr jis ki har machalti lahr is sukun ka payam hai

magar main bhi Darta hun

main jaanta hun bahr-e-be-kanar mein

kai jagah bhanwar bhi hain

har ek lahr

ghumte bhanwar ko dekhne ke waste

uchhal uchhal ke mauj tund-o-tez banti jaegi

har ek mauj

ghumte bhanwar ko bas mein lane ke liye

baDhegi

miTti jaegi

bhanwar ke daere ko aur bhi baDhaegi

bhanwar jo aaj ghumta hai sail-e-rang-e-ab par

magar abhi sukun hai

magar main phir bhi Darta hun

ki ye sukun talatum-e-nahufta ki dalil hai

talatum-e-nahufta ke KHayal se

farar chahta hun main

lo aaj main ne ek Dhang soch hi liya

magar ye kaisi andhi soch hai

main apna hath aankh par rakhe hue sitada hun

har ek samt

soch ki hadon se dur

tirgi mein gahra ek suhana raaz hai

har ek ang

mast mast narm narm ragni ka saz hai

magar main phir bhi Darta hun

ki ye sukun saat-e-fatila-e-hayat hai

hayat main ghalat samajh raha tha itni der se

hayat is jagah kahan hayat to

ufuq ki surKHiyon se dur

ajnabi dayar mein

wufur-e-shauq ke tufail

farq-e-in-o-an ko chhoD kar

ek rang ka labaada oDh kar

khaDi hai mere intizar mein

to kyon na main wahan chalun

magar jab aage baDhne

rasta dekhne ke waste

main apna hath aankh se haTata hun

to apne aage ek bahr-e-be-karan ko pata hun

magar ye kya

ki tu to ab bhi kah raha hai

teri aankh mein chamakte qatre ki misal hun

tujhe KHabar nahin

ki ye sabhi ek duri-e-nigah ka sawal hai

zara mere qarib aa ke dekh meri aankh mein

chamakta qatra bhi nahin

chamakti jhil bhi nahin

ye bahr hai