قطرہ جھیل سمندر

زمیں پہ بیٹھ کر کوئی

اگر کہے

کہ چاند ایک ابروئے خمیدہ کی مثال ہے

تو تو کہے گا

دوریٔ نگاہ میں تو اک سوال ہے

بایں دلیل

تجھ سے کہہ رہا تھا میں

کہ چرخ نیل سے

نگاہ کو ہٹا ذرا

سمٹتی پھیلتی فضائے نیل گوں کے دائرے میں

چند روز کے لئے پھسلنا چھوڑ کر

مرے قریب

اس قدر قریب آ

کہ تیرے میرے درمیاں

ہر ایک فاصلہ مٹے

تو پھر کہیں تجھے پتا چلے گا یہ

کہ میری آنکھ میں

چمکتا قطرہ بھی نہیں

چمکتی جھیل بھی نہیں

یہ بحر ہے

یہ بحر جس کی ہر مچلتی لہر اس سکون کا پیام ہے

مگر میں بھی ڈرتا ہوں

میں جانتا ہوں بحر بے کنار میں

کئی جگہ بھنور بھی ہیں

ہر ایک لہر

گھومتے بھنور کو دیکھنے کے واسطے

اچھل اچھل کے موج تند و تیز بنتی جائے گی

ہر ایک موج

گھومتے بھنور کو بس میں لانے کے لئے

بڑھے گی

مٹتی جائے گی

بھنور کے دائرے کو اور بھی بڑھائے گی

بھنور جو آج گھومتا ہے سیل رنگ آب پر

مگر ابھی سکون ہے

مگر میں پھر بھی ڈرتا ہوں

کہ یہ سکوں تلاطم نہفتہ کی دلیل ہے

تلاطم نہفتہ کے خیال سے

فرار چاہتا ہوں میں

لو آج میں نے ایک ڈھنگ سوچ ہی لیا

مگر یہ کیسی اندھی سوچ ہے

میں اپنا ہاتھ آنکھ پر رکھے ہوئے ستادہ ہوں

ہر ایک سمت

سوچ کی حدوں سے دور

تیرگی میں گہرا اک سہانا راز ہے

ہر ایک انگ

مست مست نرم نرم راگنی کا ساز ہے

مگر میں پھر بھی ڈرتا ہوں

کہ یہ سکون ساعت فتیلۂ حیات ہے

حیات میں غلط سمجھ رہا تھا اتنی دیر سے

حیات اس جگہ کہاں حیات تو

افق کی سرخیوں سے دور

اجنبی دیار میں

وفور شوق کے طفیل

فرق ایں و آں کو چھوڑ کر

ایک رنگ کا لبادہ اوڑھ کر

کھڑی ہے میرے انتظار میں

تو کیوں نہ میں وہاں چلوں

مگر جب آگے بڑھنے

رستہ دیکھنے کے واسطے

میں اپنا ہاتھ آنکھ سے ہٹاتا ہوں

تو اپنے آگے ایک بحر بیکراں کو پاتا ہوں

مگر یہ کیا

کہ تو تو اب بھی کہہ رہا ہے

تیری آنکھ میں چمکتے قطرے کی مثال ہوں

تجھے خبر نہیں

کہ یہ سبھی ایک دوریٔ نگاہ کا سوال ہے

ذرا مرے قریب آ کے دیکھ میری آنکھ میں

چمکتا قطرہ بھی نہیں

چمکتی جھیل بھی نہیں

یہ بحر ہے