qaum ke qalam-karo

qaum ke qalam-kāro

ai vatan ke fankāro

naujavān tabqe ko

rāsta dikhāo tum

ye supūt bhārat ke

gumrahī ke maare haiñ

ye ḳhud apne hī ghar ko

aag kyoñ dikhāte haiñ

aur be-sabab aksar

shor kyoñ machāte haiñ

in se kitnī vābasta

qaum kī umīdeñ haiñ

aaj laakh bhaTke hoñ

kal ke rāhbar haiñ ye

in ko ye batāo tum

ham ne apnī dhartī ko

āsmāñ banāyā hai

desh ko jagānā hai

is kī rahguzāroñ ko

kahkashāñ banānā hai

is ke ḳhārzāroñ ko

gulsitāñ banānā hai

desh ke qalam-kāro

ai vatan ke fankāro

qaum ke amīroñ ko

ḳhvāb se jagāo tum

aur un ko samjhāo

un kī jitnī daulat hai

vo nahīñ faqat un kī

vo vatan kī daulat hai

desh kī amānat hai

fāltū hai dhan jitnā

baañT deñ ġharīboñ meñ

qaum ke ḳhazāne par

saañp ban ke mat baiTheñ

varna inqalāb-e-nau

haath jab baḌhā.egā

chhīn legā saarā dhan

le uḌegā daulat ko

desh ke qalam-kāro

qaum ke ġharīboñ ko

ye payām do jā kar

ab to un kī duniyā bhī

jagmagāne vaalī hai

raat ke dayāroñ meñ

sub.h aane vaalī hai

muflisī na hogī ab

bhuk-marī na hogī ab

un kī kisht-e-vīrāñ ab

za.afarāñ ugā.egī

un ke gulsitānoñ meñ

phuul muskurā.eñge

un ke sehn-e-gulshan meñ

ab ḳhizāñ na aa.egī

qaum ke qalam-kāro

ai vatan ke fankāro

vaqt kā taqāza hai

qaum ko jagāo tum

rāsta dikhāo tum

qaum ke qalam-karo

ai watan ke fankaro

naujawan tabqe ko

rasta dikhao tum

ye suput bhaarat ke

gumrahi ke mare hain

ye KHud apne hi ghar ko

aag kyon dikhate hain

aur be-sabab aksar

shor kyon machate hain

in se kitni wabasta

qaum ki umiden hain

aaj lakh bhaTke hon

kal ke rahbar hain ye

in ko ye batao tum

hum ne apni dharti ko

aasman banaya hai

desh ko jagana hai

is ki rahguzaron ko

kahkashan banana hai

is ke KHarzaron ko

gulsitan banana hai

desh ke qalam-karo

ai watan ke fankaro

qaum ke amiron ko

KHwab se jagao tum

aur un ko samjhao

un ki jitni daulat hai

wo nahin faqat un ki

wo watan ki daulat hai

desh ki amanat hai

faltu hai dhan jitna

banT den gharibon mein

qaum ke KHazane par

sanp ban ke mat baiThen

warna inqalab-e-nau

hath jab baDhaega

chhin lega sara dhan

le uDega daulat ko

desh ke qalam-karo

qaum ke gharibon ko

ye payam do ja kar

ab to un ki duniya bhi

jagmagane wali hai

raat ke dayaron mein

subh aane wali hai

muflisi na hogi ab

bhuk-mari na hogi ab

un ki kisht-e-viran ab

zafaran ugaegi

un ke gulsitanon mein

phul muskuraenge

un ke sehn-e-gulshan mein

ab KHizan na aaegi

qaum ke qalam-karo

ai watan ke fankaro

waqt ka taqaza hai

qaum ko jagao tum

rasta dikhao tum