qaumi tarana

ai mire hindostāñ jannat-nishāñ

bah rahī haiñ tere siine par vo shītal naddiyāñ

kheltā hai jin kī lahroñ par surūroñ kā jahāñ

jhūmtā hai jin surūroñ meñ shabāb-e-jāvedāñ

pāsbānī jin kī kartā hai himāla sā javāñ

ai mire hindostāñ jannat-nishāñ

tere bāġhoñ kī lahak se jhāñktī hai zindagī

zindagī vo maut ko bhī jis se ho sharmindagī

jis se hāsil ho harīm-e-rūh ko tābindagī

ḳhuld-zāroñ kā hai tere gulsitānoñ par gumāñ

ai mire hindostāñ jannat-nishāñ

tere parbat sīm-o-zar kā gungunātā ābshār

tere chashme barbat-e-nāhīd kā zarrīn taar

tere jañgal ḳhuld ke sapne kī sundar sī bahār

mast jhoñkoñ kī zabāñ par madh bharī mausiqiyāñ

ai mire hindostāñ jannat-nishāñ

terī mastāna havāoñ meñ javānī zau-fagan

zarre zarre se numāyāñ tuur kā sā bāñkpan

muskurātī hai fazāoñ meñ nashīlī sī phaban

terī vaadī meñ surūr-o-kaif kī nahreñ ravāñ

ai mire hindostāñ jannat-nishāñ

bām-e-āzādī ke ḳhush-anjām ziine ke liye

terī ulfat ke nashīle jaam piine ke liye

yaanī terī god meñ āzād jiine ke liye

bijliyāñ ban kar gireñge ġhair par ham nā-gahāñ

ai mire hindostāñ jannat-nishāñ

ai mere hindostan jannat-nishan

bah rahi hain tere sine par wo shital naddiyan

khelta hai jin ki lahron par sururon ka jahan

jhumta hai jin sururon mein shabab-e-jawedan

pasbani jin ki karta hai himala sa jawan

ai mere hindostan jannat-nishan

tere baghon ki lahak se jhankti hai zindagi

zindagi wo maut ko bhi jis se ho sharmindagi

jis se hasil ho harim-e-ruh ko tabindagi

KHuld-zaron ka hai tere gulsitanon par guman

ai mere hindostan jannat-nishan

tere parbat sim-o-zar ka gungunata aabshaar

tere chashme barbat-e-nahid ka zarrin tar

tere jangal KHuld ke sapne ki sundar si bahaar

mast jhonkon ki zaban par madh bhari mausiqiyan

ai mere hindostan jannat-nishan

teri mastana hawaon mein jawani zau-fagan

zarre zarre se numayan tur ka sa bankpan

muskuraati hai fazaon mein nashili si phaban

teri wadi mein surur-o-kaif ki nahren rawan

ai mere hindostan jannat-nishan

baam-e-azadi ke KHush-anjam zine ke liye

teri ulfat ke nashile jam pine ke liye

yani teri god mein aazad jine ke liye

bijliyan ban kar girenge ghair par hum na-gahan

ai mere hindostan jannat-nishan