qayam-e-yak-shabana

vo chalī ga.ī

vo chaTāḳh chiḌiyā chalī ga.ī

mire āshiyāñ meñ guzashta shab vo rukī

magar dam-e-sub.h phir se vo uḌ ga.ī

use uḌte rahnā pasand thā so chalī ga.ī

baḌī shoḳh thī baḌī tez-rau

baḌā chahchahātī thī muskurātī thī

us ke pankhoñ meñ koī dām-e-visāl thā

mujhe us kā naam patā nahīñ

vo kahāñ se aa.ī nahīñ ḳhabar

vo yahīñ kahīñ pe chhupī huī to nahīñ yahīñ

kisī aur aañkh ko dām-e-husn meñ bāñdh kar

dil-e-mubtalā ko asīr-e-vasl kiye hue

vo nahīñ ga.ī vo yahīñ kahīñ to zarūr hai

wo chali gai

wo chaTaKH chiDiya chali gai

mere aashiyan mein guzashta shab wo ruki

magar dam-e-subh phir se wo uD gai

use uDte rahna pasand tha so chali gai

baDi shoKH thi baDi tez-rau

baDa chahchahati thi muskuraati thi

us ke pankhon mein koi dam-e-visal tha

mujhe us ka nam pata nahin

wo kahan se aai nahin KHabar

wo yahin kahin pe chhupi hui to nahin yahin

kisi aur aankh ko dam-e-husn mein bandh kar

dil-e-mubtala ko asir-e-wasl kiye hue

wo nahin gai wo yahin kahin to zarur hai