qila-e-akbarabad

vo bārgah-e-ḳhās kī pākīza imārat

tābāñ the jahāñ nayyar-e-shāhī-o-vazārat

baḌhtī thī jahāñ nazm-o-siysāsat kī mahārat

aatī thī jahāñ fat.h-e-mamālik kī bashārat

juuñ shahna-e-ma’zūl paḌī hai vo akārat

sayyāh kiyā karte haiñ ab us kī ziyārat

kahtā hai suḳhan-fahm se yuuñ katba daroñ kā

thā maḳhzan-e-asrār yahī tāj-varoñ kā

aurañg-e-siyah-rañg jo qaa.em hai lab-e-bām

bosa jise detā thā har ik zubda-e-uzzām

ash.ār meñ sabt us pe jahāñgīr kā hai naam

shā.ir kā qalam us kī baqā likhtā hai mādām

par saaf nazar aatā hai kuchh aur hī anjām

sālim nahīñ chhoḌegī ise gardish-e-ayyām

farsūdgī-e-dahr ne shaq ab to kyā hai

ā.inda kī nasloñ ko sabaq ḳhuub diyā hai

haañ kis liye ḳhāmosh hai o taḳht-e-jigar-resh

kis ġham meñ siyah-posh hai kyā sog hai dar-pesh

kamlī hai tire dosh pe kyuuñ sūrat-e-darvesh

jogī hai tirā panth ki suufī hai terā kesh

bolā ki zamāne ne diyā nosh kabhī nesh

sadiyāñ mujhe guzrī haiñ yahāñ tiin kam-o-besh

sadqe kabhī mujh par guhar-o-la.al hue the

shāhān-e-muazzam ke qadam maiñ ne chhue the

us ahd kā baaqī koī sāmāñ hai na asbāb

favvāre shikasta haiñ to sab hauz haiñ be-āb

vo jām-e-bilorīñ haiñ na vo gauhar-e-nāyāb

vo chilmaneñ zar-tār na vo bistar-e-kam-ḳhvāb

hangāma jo guzrā hai so afsāna thā yā ḳhvāb

ye māraz-e-ḳhuddām thā vo mauqif-e-hajjāb

vo bazm na vo daur na vo jaam na saaqī

haañ tāq-o-ravāq aur dar-o-bām haiñ baaqī

darshan ke jharoke kī paḌī thī yahīñ buniyād

hotī thī tulā-dān meñ kyā kyā dahish-o-dād

vo adl kī zanjīr huī thī yahīñ ījād

jo sam-e-shahanshāh meñ pahuñchātī thī fariyād

vo nūr-jahāñ aur jahāñgīr kī uftād

us kāḳh-e-humāyūñ ko ba-tafsīl hai sab yaad

har-chand ki be-kār ye ta.amīr paḌī hai

qadr us kī mo.arriḳh kī nigāhoñ meñ baḌī hai

vo daur hai baaqī na vo ayyām-o-ayālī

jo vāqi.a hissī thā so hai aaj ḳhayālī

har koshak-o-aivān har ik manzil-e-ālī

ibrat se hai pur aur makīnoñ se hai ḳhālī

ye jumla-mahallāt jo sunsān paḌe haiñ

patthar kā kaleja kiye hairān khaḌe haiñ

wo bargah-e-KHas ki pakiza imarat

taban the jahan nayyar-e-shahi-o-wazarat

baDhti thi jahan nazm-o-siysasat ki mahaarat

aati thi jahan fath-e-mamalik ki bashaarat

jun shahna-e-ma’zul paDi hai wo akarat

sayyah kiya karte hain ab us ki ziyarat

kahta hai suKHan-fahm se yun katba daron ka

tha maKHzan-e-asrar yahi taj-waron ka

aurang-e-siyah-rang jo qaem hai lab-e-baam

bosa jise deta tha har ek zubda-e-uzzam

ashaar mein sabt us pe jahangir ka hai nam

shair ka qalam us ki baqa likhta hai madam

par saf nazar aata hai kuchh aur hi anjam

salim nahin chhoDegi ise gardish-e-ayyam

farsudgi-e-dahr ne shaq ab to kya hai

aainda ki naslon ko sabaq KHub diya hai

han kis liye KHamosh hai o taKHt-e-jigar-resh

kis gham mein siyah-posh hai kya sog hai dar-pesh

kamli hai tere dosh pe kyun surat-e-darwesh

jogi hai tera panth ki sufi hai tera kesh

bola ki zamane ne diya nosh kabhi nesh

sadiyan mujhe guzri hain yahan tin kam-o-besh

sadqe kabhi mujh par guhar-o-lal hue the

shahan-e-muazzam ke qadam main ne chhue the

us ahd ka baqi koi saman hai na asbab

fawware shikasta hain to sab hauz hain be-ab

wo jam-e-bilorin hain na wo gauhar-e-nayab

wo chilmanen zar-tar na wo bistar-e-kam-KHwab

hangama jo guzra hai so afsana tha ya KHwab

ye maraz-e-KHuddam tha wo mauqif-e-hajjab

wo bazm na wo daur na wo jam na saqi

han taq-o-rawaq aur dar-o-baam hain baqi

darshan ke jharoke ki paDi thi yahin buniyaad

hoti thi tula-dan mein kya kya dahish-o-dad

wo adl ki zanjir hui thi yahin ijad

jo sam-e-shahanshah mein pahunchati thi fariyaad

wo nur-jahan aur jahangir ki uftad

us kaKH-e-humayun ko ba-tafsil hai sab yaad

har-chand ki be-kar ye tamir paDi hai

qadr us ki moarriKH ki nigahon mein baDi hai

wo daur hai baqi na wo ayyam-o-ayali

jo waqia hissi tha so hai aaj KHayali

har koshak-o-aiwan har ek manzil-e-ali

ibrat se hai pur aur makinon se hai KHali

ye jumla-mahallat jo sunsan paDe hain

patthar ka kaleja kiye hairan khaDe hain