qismat ka paDhne wala

mere haath pe likkhā kyā hai

umr ke uupar barq kā gahrā saaya kyā hai

kaun ḳhafā hai

raah kā būḌhā peḌ jhukā hai chiḌiyāñ haiñ chup-chāp

aatī jaatī rut ke badle gard kī gahrī chhāp

gard ke pīchhe aane vaale daur kī dhīmī thaap

rasta kyā hai manzil kyā hai

mere saath safar par āte-jāte logo mahshar kyā hai

maazī haal kā badlā badlā manzar kyā hai

maiñ aur tū kyā chiiz haiñ tinke patte ek nishān

aks ke andar TukḌe TukḌe zāhir meñ insān

kab ke DhūñD rahe haiñ ham sab apnā naḳhlistān

naaqa kyā hai mahmil kyā hai

shahar se āte-jāte logo dekho raah se kaun gayā hai

jalte kāġhaz kī ḳhushbū meñ ġharq fazā hai

chāroñ samt se log baḌhe haiñ ūñche shahr ke paas

aaj añdherī raat meñ apnā kaun hai rāh-shanās

ḳhvāb kī har ta.abīr meñ gum hai achchhī shai kī aas

din kyā shai hai saaya kyā hai

ghaTte-baḌhte chāñd ke andar duniyā kyā hai

farsh pe gir kar dil kā shīsha TuuT gayā hai

mere hath pe likkha kya hai

umr ke upar barq ka gahra saya kya hai

kaun KHafa hai

rah ka buDha peD jhuka hai chiDiyan hain chup-chap

aati jati rut ke badle gard ki gahri chhap

gard ke pichhe aane wale daur ki dhimi thap

rasta kya hai manzil kya hai

mere sath safar par aate-jate logo mahshar kya hai

mazi haal ka badla badla manzar kya hai

main aur tu kya chiz hain tinke patte ek nishan

aks ke andar TukDe TukDe zahir mein insan

kab ke DhunD rahe hain hum sab apna naKHlistan

naqa kya hai mahmil kya hai

shahar se aate-jate logo dekho rah se kaun gaya hai

jalte kaghaz ki KHushbu mein gharq faza hai

chaaron samt se log baDhe hain unche shahr ke pas

aaj andheri raat mein apna kaun hai rah-shanas

KHwab ki har tabir mein gum hai achchhi shai ki aas

din kya shai hai saya kya hai

ghaTte-baDhte chand ke andar duniya kya hai

farsh pe gir kar dil ka shisha TuT gaya hai