qissa-e-dard

chāñd ne muskurā kar kahā

dosto

qissa-e-dard chheḌe sar-e-rāh kaun

phir bhī taare musir the

ki ham aaj kī shab suneñge

vahī an-sunī dāstāñ

der tak chāñd sochā kiyā

duur āfāq kī samt dekhā kiyā

aur tāroñ kī āñkheñ chhalaktī rahīñ

raat ke dāman-e-tar ko

āhista āhista

lamhoñ kā ThanDā lahū

jazb ho ho ke rañgīn kartā rahā

nā-gahāñ ek nādīda zarrīñ raqam

dast-e-sīmīñ baḌhā aur ufuq-tā-ufuq

ek jumbish meñ khīñche hazāroñ karoḌoñ talā.ī ḳhutūt

Duub kar rah ga.e shab ke saare nuqūt

chashm-e-āfāq se

avvalīñ qatra-e-dard Tapkā

kisī barg-e-nau-ḳhez par

aks-e-anjām ruḳhsār-e-āġhāz par

chand ne muskura kar kaha

dosto

qissa-e-dard chheDe sar-e-rah kaun

phir bhi tare musir the

ki hum aaj ki shab sunenge

wahi an-suni dastan

der tak chand socha kiya

dur aafaq ki samt dekha kiya

aur taron ki aankhen chhalakti rahin

raat ke daman-e-tar ko

aahista aahista

lamhon ka ThanDa lahu

jazb ho ho ke rangin karta raha

na-gahan ek nadida zarrin raqam

dast-e-simin baDha aur ufuq-ta-ufuq

ek jumbish mein khinche hazaron karoDon talai KHutut

Dub kar rah gae shab ke sare nuqut

chashm-e-afaq se

awwalin qatra-e-dard Tapka

kisi barg-e-nau-KHez par

aks-e-anjam ruKHsar-e-aghaz par