qissa-e-shab

surḳh āñkheñ ghumāte hue bheḌiye raat kā husn haiñ

sarsarāte hue shāḳhchoñ meñ chhupe māñda panchhī

musalle pe baiThe hue rīsh-dār ahl-e-bātin

piñghūḌe meñ kilkārte nuur chehre

ye bistar badaltī huī laḌkiyāñ

zahr ugalte hue saañp

dīvār par jast karte hue saa.e

laḌtī huī billiyāñ

raat kā husn haiñ

apne sar par ye sadiyoñ se phailā huā be-mah-o-najm gardūñ

sar-e-shām rañg apnā tabdīl kartā hai to raat kā ā.īna jāgtā hai

añdheroñ bhare ā.īne meñ sadā.eñ haiñ, sūrat nahīñ

sāme.a shakl tartīb detā hai

sunte hue jagmagāte haiñ āvāz ke ḳhāl-o-ḳhad

maiñ ne sargoshiyoñ qahqahoñ manziloñ āhaToñ

aur aahoñ meñ dekhā hai husn

ek pairā.e meñ sar uThātī haiñ ġhurrāhTeñ, vasl-āsār sāñseñ

ye palkeñ jo āhista āhista Dhalne lagī haiñ

shafaq jo añdhere meñ ghulne lagī hai

yahī raat kā husn hai

raat āñkhoñ meñ hai

surKH aankhen ghumate hue bheDiye raat ka husn hain

sarsaraate hue shaKHchon mein chhupe manda panchhi

musalle pe baiThe hue rish-dar ahl-e-baatin

pinghuDe mein kilkarte nur chehre

ye bistar badalti hui laDkiyan

zahr ugalte hue sanp

diwar par jast karte hue sae

laDti hui billiyan

raat ka husn hain

apne sar par ye sadiyon se phaila hua be-mah-o-najm gardun

sar-e-sham rang apna tabdil karta hai to raat ka aaina jagta hai

andheron bhare aaine mein sadaen hain, surat nahin

samea shakl tartib deta hai

sunte hue jagmagate hain aawaz ke KHal-o-KHad

main ne sargoshiyon qahqahon manzilon aahaTon

aur aahon mein dekha hai husn

ek pairae mein sar uThati hain ghurrahTen, wasl-asar sansen

ye palken jo aahista aahista Dhalne lagi hain

shafaq jo andhere mein ghulne lagi hai

yahi raat ka husn hai

raat aankhon mein hai