qissa-KHwani bazar ki ek sham

tasāhul kī chādar lapeTe hue qissa-ḳhvānī ik shaam thī

ham vahāñ apnī din bhar kī is jān-levā thakan se

nabard-āzmā

ḳhuub qahvoñ pe qahve ke piyāle luñDhāte rahe

aur apne buland-bāñg dāvoñ se aur qahqahoñ se

kahīñ ghoñsloñ meñ chhupe thak ke so.e hue

nīm-jāñ tā.eroñ ko jagāte rahe

aur guzre zamāne ke pīroñ faqīroñ kī koī na ka.ī karāmat sunāte rahe

(kis tarah sāhibān-e-karāmāt barzaḳh to barzaḳh

shar-añgez zindoñ kī rūheñ bulāne pe qādir

sabhī ko bad-āmāliyoñ se bachāte rahe)

par jo ye sab nahī mānte the

vo nisvār kī tez bū meñ base

iiñT gaare ke ik nīm-puḳhta thaḌe par

bar-afroḳhta ho ke inkār meñ sar hilāte rahe

haañ magar vo ki jin ke laboñ par

charas aur gāñje kī uudī sī tah

mustaqil jam ga.ī thī

faqat muskurāte rahe

aur sañgat meñ maujūd jo ''bachcha-ḳhush'' the

vo har aate jaate trahdār kam-umr laḌke ko

ā.ankhoñ hī ā.ankhoñ meñ paate rahe

phir sab aapas meñ mil kar

karachi se kundūz tak pesha kartī huī kasbiyoñ

hijḌoñ aur louñDoñ ke

pur-kaif qisse sunāte rahe

gudgudāte rahe

dil lubhāte rahe

tasahul ki chadar lapeTe hue qissa-KHwani ek sham thi

hum wahan apni din bhar ki is jaan-lewa thakan se

nabard-azma

KHub qahwon pe qahwe ke piyale lunDhate rahe

aur apne buland-bang dawon se aur qahqahon se

kahin ghonslon mein chhupe thak ke soe hue

nim-jaan taeron ko jagate rahe

aur guzre zamane ke piron faqiron ki koi na kai karamat sunate rahe

(kis tarah sahiban-e-karamat barzaKH to barzaKH

shar-angez zindon ki ruhen bulane pe qadir

sabhi ko bad-amaliyon se bachate rahe)

par jo ye sab nahi mante the

wo niswar ki tez bu mein base

inT gare ke ek nim-puKHta thaDe par

bar-afroKHta ho ke inkar mein sar hilate rahe

han magar wo ki jin ke labon par

charas aur ganje ki udi si tah

mustaqil jam gai thi

faqat muskuraate rahe

aur sangat mein maujud jo bachcha-KHush the

wo har aate jate trahdar kam-umr laDke ko

aaankhon hi aaankhon mein pate rahe

phir sab aapas mein mil kar

karachi se kunduz tak pesha karti hui kasbiyon

hijDon aur lounDon ke

pur-kaif qisse sunate rahe

gudgudate rahe

dil lubhate rahe