qissa tamam

ḳhaak meñ ḳhaak milī

aur huā qissa tamām

aag meñ aag mile to bhaḌke

aab meñ aab mile to machle

ḳhaak meñ ḳhaak mile

aur ho sab qissa tamām

jaise saa.e pe girā ho saaya

jaise chhā jaa.e shaam

garm pur-shor se din kā ye bhayānak anjām

vaqt be-rahm

ġhazabnāk

balā kā saffāk

vaqt vo sail-e-ravāñ

jis ke aage jo chale vo bhī mare

jis se pīchhe jo rahe vo bhī mare

aur vo vaqt kī tasḳhīr ko niklā thā kabhī

phir vo raste meñ rahā

shaam huī

der huī

ḳhaak meñ ḳhaak milī

us ko ma.alūm thā ''ret ā.īna hai''

ā.īna kaisā hai kirchī kirchī

dhuup aisī ki muñDeroñ se girī jaatī hai

ḳhvāb se rañg churānā

aag se ḳhud ko bachānā koī āsāñ to nahīñ

vaqt se aage nikalnā hogā

so vo niklā aur phir

rañg meñ rañg milā

aag se aag jalī

ḳhaak meñ ḳhaak milī

zindagī khul ke hañsī

KHak mein KHak mili

aur hua qissa tamam

aag mein aag mile to bhaDke

aab mein aab mile to machle

KHak mein KHak mile

aur ho sab qissa tamam

jaise sae pe gira ho saya

jaise chha jae sham

garm pur-shor se din ka ye bhayanak anjam

waqt be-rahm

ghazabnak

bala ka saffak

waqt wo sail-e-rawan

jis ke aage jo chale wo bhi mare

jis se pichhe jo rahe wo bhi mare

aur wo waqt ki tasKHir ko nikla tha kabhi

phir wo raste mein raha

sham hui

der hui

KHak mein KHak mili

us ko malum tha ret aaina hai

aaina kaisa hai kirchi kirchi

dhup aisi ki munDeron se giri jati hai

KHwab se rang churana

aag se KHud ko bachana koi aasan to nahin

waqt se aage nikalna hoga

so wo nikla aur phir

rang mein rang mila

aag se aag jali

KHak mein KHak mili

zindagi khul ke hansi