qubuliyat

aur phir aise huā ānand ḳhālī haath lauTā

aur kahā bhagvān is nagrī meñ aisā

ek daulat-mand bhī hai jis ko daulat se koī raġhbat nahīñ hai aur

saarā dhan hameñ bhikshā meñ denā chāhtā hai

ham to ḳhālī haath lauTe haiñ tathāgat

budh bole us kā denā farz hai lenā tumhārā

tum tahī dast-e-talab phailā.e jholī vā kiye jab

us ke darvāze pe jaate ho to apnā farz samjho

jo bhī mil jaa.e khule māthe se le lo

merī daryūza-garī kī ye hadīs-e-āḳhirī hai

go-mago kī kaifiyat meñ thā abhī ānand bolā

pīr-o-murshid sonā chāñdī to faqat maayā hai is se

bhikshuoñ kā kyā ta'alluq

budh bole

dast-e-daryūza-gar-o-darvesh ḳhālī hai agar apnī anā se

to use kyā ḳhauf maayā se jo kal tak

dast-e-hātim meñ thī lekin aaj us kī

apnī jholī meñ paḌī hai

sāhab-e-sarvat kī hātim kī saḳhāvat us kī tash.hīr-e-anā hai

aur tum apnī anā to ḳhatm kar baiThe ho ye tum jānte ho

is liye jo bhī mile manzūr kar lo

jo mile manzūr kar leñ

haañ sabhī kuchh

sonā chāñdī aur daulat bhī tathāgat

haañ sabhī kuchh

aur bhikshā meñ agar 'aurat mile to

hichkichā.e ek lamha chup rahe phir ek āh-e-sard bhar kar

zer-e-lab bole qubūliyyat kī koī had nahīñ hai

aur phir aise hua aanand KHali hath lauTa

aur kaha bhagwan is nagri mein aisa

ek daulat-mand bhi hai jis ko daulat se koi raghbat nahin hai aur

sara dhan hamein bhiksha mein dena chahta hai

hum to KHali hath lauTe hain tathagat

budh bole us ka dena farz hai lena tumhaara

tum tahi dast-e-talab phailae jholi wa kiye jab

us ke darwaze pe jate ho to apna farz samjho

jo bhi mil jae khule mathe se le lo

meri daryuza-gari ki ye hadis-e-aKHiri hai

go-mago ki kaifiyat mein tha abhi aanand bola

pir-o-murshid sona chandi to faqat maya hai is se

bhikshuon ka kya ta'alluq

budh bole

dast-e-daryuza-gar-o-darwesh KHali hai agar apni ana se

to use kya KHauf maya se jo kal tak

dast-e-hatim mein thi lekin aaj us ki

apni jholi mein paDi hai

sahab-e-sarwat ki hatim ki saKHawat us ki tashhir-e-ana hai

aur tum apni ana to KHatm kar baiThe ho ye tum jaante ho

is liye jo bhi mile manzur kar lo

jo mile manzur kar len

han sabhi kuchh

sona chandi aur daulat bhi tathagat

han sabhi kuchh

aur bhiksha mein agar 'aurat mile to

hichkichae ek lamha chup rahe phir ek aah-e-sard bhar kar

zer-e-lab bole qubuliyyat ki koi had nahin hai