quqnus

mire quqnusā mire quqnusā

vo jo laavā tere dahan meñ thā

vo jo paarā tere badan meñ thā

vo jo aag tere paroñ meñ thī

use kaun qāfile le ga.e

use kaun qāfile le ga.e

tire halaq meñ vo safīr-e-ḳhvāb-e-azīm thī

ki ḳhalā-e-fikr meñ kho ke jo

tirī aabrū kā kafan banī

pas-e-nūr-e-sho.ala-e-āgahī

vo karāmateñ ki qafas qafas

vahī aag terī chitā kī thī

vahī shor terī sadā kā thā

vahī gulḳhan-e-zard-rū thā

vahī rauzan-e-sar-e-gard thā

vo tamāzat aisī balā kī thī

ki tamām shāhoñ kī naḳhvateñ

unhī gudḌiyoñ ke karam meñ thiiñ

jinheñ hāthiyoñ ne kuchal diyā

mire quqnusā mire quqnusā

zarā apne ḳhol ko toḌ kar

ki gale ke tāroñ ko joḌ kar

sar-e-koh-e-ḳhauf tulūa ho

ki tamām shahroñ meñ dar-ba-dar

ye jo zamharīr sitam kā hai

ye jo raakh tūr-e-alam kī hai

ye jo marg ahl-e-qalam kī hai

ye jo shakl rāh-e-adam kī hai

ye qusūr kis kā hai quqnusā

ye qusūr kis kā hai quqnusā

tirī haDDiyoñ meñ vo barf hai jo lahū ko sang banā ga.ī

tire qalb meñ vo glacier ki jo sūrajoñ ko bujhā gayā

tire sard-ḳhānoñ kī qaid se jo havā.eñ chhūT ke aa.ī thiiñ

mire dil kī saarī harārateñ vo jilau meñ bāñdh ke le ga.iiñ

zarā āñkheñ khol ke dekh tū

ki zamām-e-raḳhsh-e-habāb-e-jāñ

tirī muTThiyoñ meñ rahī nahīñ

mirī muTThiyoñ meñ rahī nahīñ

mere quqnusa mere quqnusa

wo jo lawa tere dahan mein tha

wo jo para tere badan mein tha

wo jo aag tere paron mein thi

use kaun qafile le gae

use kaun qafile le gae

tere halaq mein wo safir-e-KHwab-e-azim thi

ki KHala-e-fikr mein kho ke jo

teri aabru ka kafan bani

pas-e-nur-e-shoala-e-agahi

wo karamaten ki qafas qafas

wahi aag teri chita ki thi

wahi shor teri sada ka tha

wahi gulKHan-e-zard-ru tha

wahi rauzan-e-sar-e-gard tha

wo tamazat aisi bala ki thi

ki tamam shahon ki naKHwaten

unhi gudDiyon ke karam mein thin

jinhen hathiyon ne kuchal diya

mere quqnusa mere quqnusa

zara apne KHol ko toD kar

ki gale ke taron ko joD kar

sar-e-koh-e-KHauf tulua ho

ki tamam shahron mein dar-ba-dar

ye jo zamharir sitam ka hai

ye jo rakh tur-e-alam ki hai

ye jo marg ahl-e-qalam ki hai

ye jo shakl rah-e-adam ki hai

ye qusur kis ka hai quqnusa

ye qusur kis ka hai quqnusa

teri haDDiyon mein wo barf hai jo lahu ko sang bana gai

tere qalb mein wo glacier ki jo surajon ko bujha gaya

tere sard-KHanon ki qaid se jo hawaen chhuT ke aai thin

mere dil ki sari hararaten wo jilau mein bandh ke le gain

zara aankhen khol ke dekh tu

ki zamam-e-raKHsh-e-habab-e-jaan

teri muTThiyon mein rahi nahin

meri muTThiyon mein rahi nahin