qurb-e-ilahi

maiñ thā qurb-e-ilāhī se shād-o-magan

us se mahv-e-suḳhan

ki achānak vahīñ

haañ haram ke qarīb

ek ma.asūm bachchī ne dekhā mujhe

us kī nazroñ meñ to

hasrat-o-yās thī

ik zamāne kī shāyad

vahāñ pyaas thī

maañ kī mamtā kī pyaas

baabā jaanī kī pyaas

ghar ke āñgan kī pyaas

ḳhush-libāsī kī pyaas

khāne paanī kī pyaas

kho.e bachpan kī pyaas

kuchh laḌakpan kī pyaas

gahne kañgan kī pyaas

us kī āñkhoñ ne mujh se sabhī kah diyā

us ne hoñToñ ko hilne kī zahmat na dī

peT paale hai vo

Topiyāñ bech kar

shohratoñ ko miyāñ

kuchh anā bech kar

apne sar pe vo chādar sajā.e hue

dhuul miTTī se ḳhud ko bachā.e hue

sau savāloñ ko ḳhud meñ samā.e hue

pair taptī zamīñ par jamā.e hue

Dhāñptī hai vo logoñ ke

sar aur badan

bāñdhe sar pe kafan

mere dil ne kahā

shafqat-e-bāp kyā hai batā de ise

maañ kī mamtā kahīñ se lā de ise

ḳhvāhisheñ puurī hoñ

saarī pyāseñ bujheñ

āb-e-zam-zam kuchh aisā pilā de ise

us ke chehre se phir merī nazreñ haTeñ

aur achānak meñ phir qibla-rū ho gayā

haath uTThe duā ko ki ai kibriyā

tere ghar meñ to bas nuur hī nuur hai

par tire sahn meñ

kitnī māyūs nannhī sī ik huur hai

is kī chādar ko pur-nūr kar de ḳhudā

is ke ġham saare tū duur kar de ḳhudā

terī rahmat ke dāman meñ kyā kuchh nahīñ

tere āñgan meñ kab se duā-go hai ye

ai ḳhudā tere āñgan meñ kyā kuchh nahīñ

main tha qurb-e-ilahi se shad-o-magan

us se mahw-e-suKHan

ki achanak wahin

han haram ke qarib

ek masum bachchi ne dekha mujhe

us ki nazron mein to

hasrat-o-yas thi

ek zamane ki shayad

wahan pyas thi

man ki mamta ki pyas

baba jaani ki pyas

ghar ke aangan ki pyas

KHush-libasi ki pyas

khane pani ki pyas

khoe bachpan ki pyas

kuchh laDakpan ki pyas

gahne kangan ki pyas

us ki aankhon ne mujh se sabhi kah diya

us ne honTon ko hilne ki zahmat na di

peT pale hai wo

Topiyan bech kar

shohraton ko miyan

kuchh ana bech kar

apne sar pe wo chadar sajae hue

dhul miTTi se KHud ko bachae hue

sau sawalon ko KHud mein samae hue

pair tapti zamin par jamae hue

Dhanpti hai wo logon ke

sar aur badan

bandhe sar pe kafan

mere dil ne kaha

shafqat-e-bap kya hai bata de ise

man ki mamta kahin se la de ise

KHwahishen puri hon

sari pyasen bujhen

aab-e-zam-zam kuchh aisa pila de ise

us ke chehre se phir meri nazren haTen

aur achanak mein phir qibla-ru ho gaya

hath uTThe dua ko ki ai kibriya

tere ghar mein to bas nur hi nur hai

par tere sahn mein

kitni mayus nannhi si ek hur hai

is ki chadar ko pur-nur kar de KHuda

is ke gham sare tu dur kar de KHuda

teri rahmat ke daman mein kya kuchh nahin

tere aangan mein kab se dua-go hai ye

ai KHuda tere aangan mein kya kuchh nahin