qurb-e-qayamat

ye chiḌiyā jo pañkhe se Takrā ga.ī hai

use to faqat āshiyāna banāne kī dhun thī

use vaqt kī piiTh se laakh do laakh sāloñ ke girne kā andāza kab thā

use kyā ḳhabar thī

vo sarsabz ayyām murjhā chuke haiñ

vo insāñ se pahle ke shādāb jañgal

jahāñ ghoñsloñ aur uḌānoñ ke mā-bain

dhātoñ kī parrāñ fasleñ nahīñ thiiñ

uqāboñ ke par aaj bhī sarsarā.eñ

to ma.asūm chiḌiyoñ ke dil sahm jaa.eñ

magar un ko ma.alūm kyā hai

ki qurb-e-qayāmat ke āsār paidā haiñ

be-jān lohe ko par lag ga.e haiñ

ye chiDiya jo pankhe se Takra gai hai

use to faqat aashiyana banane ki dhun thi

use waqt ki piTh se lakh do lakh salon ke girne ka andaza kab tha

use kya KHabar thi

wo sarsabz ayyam murjha chuke hain

wo insan se pahle ke shadab jangal

jahan ghonslon aur uDanon ke ma-bain

dhaton ki parran faslen nahin thin

uqabon ke par aaj bhi sarsaraen

to masum chiDiyon ke dil sahm jaen

magar un ko malum kya hai

ki qurb-e-qayamat ke aasar paida hain

be-jaan lohe ko par lag gae hain