qurbani ke bakre

phir aa gayā hai mulk meñ qurbāniyoñ kā maal

kī iḳhtiyār qīmatoñ ne rākiToñ kī chaal

qāmat meñ bakrā uuñT kī qīmat kā ham-ḳhayāl

dil baiThtā hai uThte hī qurbānī kā savāl

qīmat ne aadmī hī ko bakrā banā diyā

bakre ko misl-e-nāqa-e-lailā banā diyā

bakre ke pīchhe pīchhe haiñ majnūñ kā bhar ke svāñg

gar ho sake ḳharīdiy.e bakre kī ek Taañg

qīmat jo Taañg kī hai lagā degī phir chhalāñg

''mujh se mire gunah kā hisāb ai ḳhudā na māñg''

''TeḌhā lagā hai qat qalam-e-sarnavisht ko''

mahñgā.ī meñ chalā hai ye bakrā bahisht ko

dehāt se jo shahar meñ bakroñ ko laa.e haiñ

ma.alūm ho rahā hai vo jannat se aa.e haiñ

qīmat ne āsmān ke taare dikhā.e haiñ

bakrā nahīñ ḳharīdā gunah baḳhshvā.e haiñ

qurbānī aise haal meñ amr-e-muhāl hai

bakrā ''tamām halqa-e-dām-e-ḳhayāl hai''

qurbānī ho bhī jaa.e magar khiñch rahī hai khaal

ai gosht khāne vaalo zarā ḳhud karo ḳhayāl

bakre ke saath hotā hai gāhak kā intiqāl

gar qīmateñ yahī haiñ to jiine kā kyā savāl

haiñ gallā-bān logoñ ke pīchhe paḌe hue

aur bakrā le ke ham bhī haiñ murġhe bane hue

chaurāhoñ par khaḌe hue bakroñ ke haiñ jo ġhol

tū un ke muñh ko khol ke dāñtoñ ko mat TaTol

qīmat meñ varna aa.egā fauran hī itnā jhol

sone kā jaise bakrā ho aisā paḌegā mol

ḳhud hī kahegā bakrā ki tujh meñ agar hai aql

''apnī galī meñ mujh ko na kar dafn ba.ad-e-qatl''

bakre tamām raah meñ huñkārte chale

bañgloñ ke bel-būToñ pe muñh mārte chale

jis ghar meñ ghus ga.e vahīñ iftārte chale

aur jab hile jagah se to siskārte chale

ghar vaale kah rahe haiñ ki bāhar nikāl do

bakre musir haiñ is pe ki Derā hī Daal do

bakrā jo siiñg vaalā bhī hai aur fasādī hai

us ne siyāsī-jalsoñ meñ gaḌbaḌ machā dī hai

chalte hue julūs meñ Takkar lagā dī hai

aur votaroñ meñ pārTī-bāzī karā dī hai

bakre haiñ leaderoñ kī tarah jin pe jhuul hai

hunkārte haiñ chup bhī karānā fuzūl hai

bakre jo phir rahe haiñ saḌak par idhar udhar

jalsoñ meñ aur julūsoñ meñ karte haiñ shab basar

bakre kī puurī nasl se bezār haiñ bashar

jamhūriyat ke bakroñ kī le kyā koī ḳhabar

Dar hai ki bakrā bhuuk kī haḌtāl kar na jaa.e

manhūs sab ke vāste ye saal kar na jaa.e

qurbāniyoñ kā daur hai bakroñ kī ḳhair ho

hai aur baat hālat-e-insān ġhair ho

qarze meñ us kā jakḌā huā haath pair ho

lekin nasīb bakre ko jannat kī sair ho

bakre ke sar pe aa.egī shāmat hī kyuuñ na ho

''is meñ hamāre sar pe qayāmat hī kyuuñ na ho''

bakroñ kī itnī garmī-e-bāzār dekh kar

aur qīmatoñ kī tezī-e-raftār dekh kar

bakrā ḳharīdā sastā sā bīmār dekh kar

jo mar gayā chhurī pe mirī dhaar dekh kar

mere nasīb meñ na thī qurbānī kī ḳhushī

is maslahat se kar lī hai bakre ne ḳhud-kushī

phir aa gaya hai mulk mein qurbaniyon ka mal

ki iKHtiyar qimaton ne rakiTon ki chaal

qamat mein bakra unT ki qimat ka ham-KHayal

dil baiThta hai uThte hi qurbani ka sawal

qimat ne aadmi hi ko bakra bana diya

bakre ko misl-e-naqa-e-laila bana diya

bakre ke pichhe pichhe hain majnun ka bhar ke swang

gar ho sake KHaridiye bakre ki ek Tang

qimat jo Tang ki hai laga degi phir chhalang

mujh se mere gunah ka hisab ai KHuda na mang

TeDha laga hai qat qalam-e-sarnawisht ko

mahngai mein chala hai ye bakra bahisht ko

dehat se jo shahar mein bakron ko lae hain

malum ho raha hai wo jannat se aae hain

qimat ne aasman ke tare dikhae hain

bakra nahin KHarida gunah baKHshwae hain

qurbani aise haal mein amr-e-muhaal hai

bakra tamam halqa-e-dam-e-KHayal hai

qurbani ho bhi jae magar khinch rahi hai khaal

ai gosht khane walo zara KHud karo KHayal

bakre ke sath hota hai gahak ka intiqal

gar qimaten yahi hain to jine ka kya sawal

hain galla-ban logon ke pichhe paDe hue

aur bakra le ke hum bhi hain murghe bane hue

chaurahon par khaDe hue bakron ke hain jo ghol

tu un ke munh ko khol ke danton ko mat TaTol

qimat mein warna aaega fauran hi itna jhol

sone ka jaise bakra ho aisa paDega mol

KHud hi kahega bakra ki tujh mein agar hai aql

apni gali mein mujh ko na kar dafn baad-e-qatl

bakre tamam rah mein hunkarte chale

banglon ke bel-buTon pe munh marte chale

jis ghar mein ghus gae wahin iftarte chale

aur jab hile jagah se to siskarte chale

ghar wale kah rahe hain ki bahar nikal do

bakre musir hain is pe ki Dera hi Dal do

bakra jo sing wala bhi hai aur fasadi hai

us ne siyasi-jalson mein gaDbaD macha di hai

chalte hue julus mein Takkar laga di hai

aur wotaron mein parTi-bazi kara di hai

bakre hain leaderon ki tarah jin pe jhul hai

hunkarte hain chup bhi karana fuzul hai

bakre jo phir rahe hain saDak par idhar udhar

jalson mein aur juluson mein karte hain shab basar

bakre ki puri nasl se bezar hain bashar

jamhuriyat ke bakron ki le kya koi KHabar

Dar hai ki bakra bhuk ki haDtal kar na jae

manhus sab ke waste ye sal kar na jae

qurbaniyon ka daur hai bakron ki KHair ho

hai aur baat haalat-e-insan ghair ho

qarze mein us ka jakDa hua hath pair ho

lekin nasib bakre ko jannat ki sair ho

bakre ke sar pe aaegi shamat hi kyun na ho

is mein hamare sar pe qayamat hi kyun na ho

bakron ki itni garmi-e-bazar dekh kar

aur qimaton ki tezi-e-raftar dekh kar

bakra KHarida sasta sa bimar dekh kar

jo mar gaya chhuri pe meri dhaar dekh kar

mere nasib mein na thi qurbani ki KHushi

is maslahat se kar li hai bakre ne KHud-kushi