qurrat-ul-ain-tahira ke liye ek nazm

ai qatīl-e-harf-e-lā

ai māh-e-qazvīñ sun

tire iqbāl kā marqad charāġh-e-asr thā

ab tāq-e-nisyāñ meñ sajāyā jā chukā hai

niil ke sāhil se le kar tā-ba-ḳhāk kā sher

ik ḳhvāb thā shāyad bhulāyā jā chukā hai

aur hamārī lok-dānish kā hamāre madrasoñ meñ dāḳhila mamnūa Thahrā hai

zar-e-ḳhālis luTāyā jā rahā hai ko.eloñ par saḳht pahrā hai

purāne mābadoñ ke tāqchoñ meñ gard uḌtī hai

gulistāñ bostāñ va bulbul-e-shīrāz bhī yaañ ajnabī Thahre

mujhe ab kaun pūchhegā

qatīl-e-harf-e-lā

kā.enātī ishāriya

vahāñ jo kuchh huā hai raushnī mujh ko batātī hai

yahāñ jo ho rahā hai raushnī tum ko batā.ege

magar ye raushnī aage bhī jā.egī

har ik shai ko bil-āḳhir nuur ke sāñche meñ Dhalnā hai

hameñ bhī do qadam is raushnī ke saath chalnā hai

ye musht-e-ḳhāk bhī maqdūr-bhar to jagmagā.egī

mashiyyat muskurā.egī

magar ye raushnī aage bhī jā.egī

ai qatil-e-harf-e-la

ai mah-e-qazwin sun

tere iqbaal ka marqad charagh-e-asr tha

ab taq-e-nisyan mein sajaya ja chuka hai

nil ke sahil se le kar ta-ba-KHak ka sher

ek KHwab tha shayad bhulaya ja chuka hai

aur hamari lok-danish ka hamare madrason mein daKHila mamnua Thahra hai

zar-e-KHalis luTaya ja raha hai koelon par saKHt pahra hai

purane mabadon ke taqchon mein gard uDti hai

gulistan bostan wa bulbul-e-shiraaz bhi yan ajnabi Thahre

mujhe ab kaun puchhega

qatil-e-harf-e-la

kaenati ishaariya

wahan jo kuchh hua hai raushni mujh ko batati hai

yahan jo ho raha hai raushni tum ko bataege

magar ye raushni aage bhi jaegi

har ek shai ko bil-aKHir nur ke sanche mein Dhalna hai

hamein bhi do qadam is raushni ke sath chalna hai

ye musht-e-KHak bhi maqdur-bhar to jagmagaegi

mashiyyat muskuraegi

magar ye raushni aage bhi jaegi