rabta

ek raj.at ke marhale meñ rahūñ

maiñ palaTne ke mashġhale meñ rahūñ

ye taqāza thā jaane vāloñ kā

bichhḌī nasloñ se rābte meñ rahūñ

maiñ kaḌī huuñ ga.e zamānoñ kī

shahr-e-māzī ke ḳhaak dānoñ kī

raakh hote hue jahānoñ kī

bhūle-bisre hue fasānoñ kī

sah sakegā na ab mizāj apnā

nīsh-e-vahshat kī dard añgezī

apnī aqdār se tasādum-ḳhez

dard-e-ehsās kī numū-ḳhezī

ham ko jo mil gayā tasalsul se

nazr-e-tūfān-e-sañg to na kareñ

apne aslāf se jo faiz milā

us ko vahshat ba-rañg to na kareñ

hameñ nāmūs kī virāsat ko

sho.ala-e-jāñ banā ke rakhnā hai

apne maazī se rābte ke liye

apnā virsa bachā ke rakhnā hai

apne miTte hue havāloñ ko

aane vaalo bachā ke rakhnā hai

ham ko ab aas ke jazīroñ meñ

kashtiyoñ ko jalā ke rahnā hai

varna ye rabt TuuT jā.egā

aur tasalsul bhī chhūT jā.egā

ek rajat ke marhale mein rahun

main palaTne ke mashghale mein rahun

ye taqaza tha jaane walon ka

bichhDi naslon se rabte mein rahun

main kaDi hun gae zamanon ki

shahr-e-mazi ke KHak danon ki

rakh hote hue jahanon ki

bhule-bisre hue fasanon ki

sah sakega na ab mizaj apna

nish-e-wahshat ki dard angezi

apni aqdar se tasadum-KHez

dard-e-ehsas ki numu-KHezi

hum ko jo mil gaya tasalsul se

nazr-e-tufan-e-sang to na karen

apne aslaf se jo faiz mila

us ko wahshat ba-rang to na karen

hamein namus ki wirasat ko

shoala-e-jaan bana ke rakhna hai

apne mazi se rabte ke liye

apna wirsa bacha ke rakhna hai

apne miTte hue hawalon ko

aane walo bacha ke rakhna hai

hum ko ab aas ke jaziron mein

kashtiyon ko jala ke rahna hai

warna ye rabt TuT jaega

aur tasalsul bhi chhuT jaega