raegan subh ki chita par

ham jo kabhī kabhī hote haiñ

aur akasr nahīñ hote

ḳhvāb kī aulād haiñ

takmīl ik sahrā kā naam hai

jis ke safar ke liye

jitnī nasloñ kī umr chāhe

utnī nasleñ abhī paidā nahīñ huiiñ

aur vo jo mere sahrā kā sarāb thā

maiñ ne apne apne zinda lamhoñ ko

us ke naam kar diyā

vo kaun thā

vo marte hue mazdūroñ kī umañg nahīñ thā

aur vo ġharīb tālib-e-ilm kī vo fees nahīñ thā

jo ek ek paise se mil kar bantī hai

aur vo kuñvārī beTī kā vo jahez bhī nahīñ thā

jo ḳhushī ke mazbūt taale kī iklautī kunjī ban jaatā

vo kaun thā

vo tanhā.ī se mazīd tanhā.ī tak safar kā vo darmiyān thā

jo sirf bahrūp hotā hai

ḳhvāb ne bahrūp se shādī kar lī

aur maiñ ne apne zinda lamhoñ ko

bahrūp ke naam kar diyā

jis kā naam ḳhud-farebī hai

ruup aur bahrūp ke darmiyān bahtī hai

vo jo dhund kī lakīr ke us paar

bahrūp kī duniyā meñ chalā gayā

lauT kar na aayā

aur maiñ ne lauT kar na aane vāloñ ke naam

asl ke zamāne kar diye

asl ke zamāne

lauT kar na aane vāloñ ke saath

dhund ke us paar chale ga.e

ye dil vo muusā hai

jo aag lene gayā aur use sirf aag hī milī

añgāroñ ko thaam kar

muusā ne apne haath jalā liye

aur zindagī ke rañg ne

jale hue hāthoñ par chaḌhne se inkār kar diyā

maiñ takmīl ke sahrā meñ bhaTaktā huā zarra huuñ

sūraj hone ke gumān se duur

aur bache hue lamhoñ ko god meñ liye zindagī

har rā.egāñ sub.h kī chitā par

satī ho jaane vaalī beva hai

hum jo kabhi kabhi hote hain

aur akasr nahin hote

KHwab ki aulad hain

takmil ek sahra ka nam hai

jis ke safar ke liye

jitni naslon ki umr chahe

utni naslen abhi paida nahin huin

aur wo jo mere sahra ka sarab tha

main ne apne apne zinda lamhon ko

us ke nam kar diya

wo kaun tha

wo marte hue mazduron ki umang nahin tha

aur wo gharib talib-e-ilm ki wo fees nahin tha

jo ek ek paise se mil kar banti hai

aur wo kunwari beTi ka wo jahez bhi nahin tha

jo KHushi ke mazbut tale ki iklauti kunji ban jata

wo kaun tha

wo tanhai se mazid tanhai tak safar ka wo darmiyan tha

jo sirf bahrup hota hai

KHwab ne bahrup se shadi kar li

aur main ne apne zinda lamhon ko

bahrup ke nam kar diya

jis ka nam KHud-farebi hai

rup aur bahrup ke darmiyan bahti hai

wo jo dhund ki lakir ke us par

bahrup ki duniya mein chala gaya

lauT kar na aaya

aur main ne lauT kar na aane walon ke nam

asl ke zamane kar diye

asl ke zamane

lauT kar na aane walon ke sath

dhund ke us par chale gae

ye dil wo musa hai

jo aag lene gaya aur use sirf aag hi mili

angaron ko tham kar

musa ne apne hath jala liye

aur zindagi ke rang ne

jale hue hathon par chaDhne se inkar kar diya

main takmil ke sahra mein bhaTakta hua zarra hun

suraj hone ke guman se dur

aur bache hue lamhon ko god mein liye zindagi

har raegan subh ki chita par

sati ho jaane wali bewa hai